Toyoda Gosei am gau ffatri cydrannau ceir yng Ngorseinon

Mae cwmni sy'n cynhyrchu cydrannau ar gyfer y diwydiant ceir wedi cyhoeddi eu bwriad i gau eu safle yng Ngorseinon, ger Abertawe.

Dywed Toyoda Gosei o Japan eu bod wedi dechrau'r broses o ymgynghori gyda'r gweithwyr ynglŷn â chau eu safleoedd yn y Deyrnas Unedig.

Mae 207 o weithwyr llawn amser yng Ngorseinon, a 68 o weithwyr rhan amser.

Fe agorodd y safle yn 2011 gan gyflenwi cwmnïau fel Toyota, Nissan, Renault, Honda a Jaguar Land Rover.

Mae'r gweithlu eisoes wedi ei gwtogi'n sylweddol, ers cyflogi tua 800 o bobl yn 2015.

Yn Rhagfyr 2020 cyhoeddodd Llywodraeth Cymru y byddai'r cwmni yn derbyn gymhorthdal o £116,000 er mwyn diogleu tua 120 o swyddi rhag effeithiau economaidd coronafierws.

• Perygl colli 200 o swyddi ffatri 'oherwydd Brexit'

• Cau ffatri yn Llanelli gyda cholled 100 o swyddi

Dim ond llond llaw o weithwyr gafodd eu gweld ar y safle ddydd Mercher, pan fyddai cannoedd ar ddiwrnod arferol

Dywedodd y cwmni ei fod hefyd yn bwriadu cau safle yn Rotherham yn Lloegr.

Yn ôl llefarydd mae'r newidiadau yn angenrheidiol wrth ymateb i ostyngiad sylweddol ymhlith cwsmeriaid y DU am eu cynnyrch.

Doeddynt chwaith ddim yn rhagweld y byddai cynnydd yn y galw yn y dyfodol.

Ychwanegodd fod y newidiadau yn rhan o gynllun ad-drefnu'r cwmni o fewn eu busnesau yn Ewrop, gan gynnwys symud peth o'r gwaith cynhyrchu i'r prif safle yn y Weriniaeth Siec.

Dywedodd llefarydd ar ran Llywodraeth Cymru ei bod "mewn cysylltiad â Toyoda Gosei ynghylch eu cynlluniau i ymgynghori ar gau safle Abertawe" ac y byddai hynny'n parhau yn ystod yr ymgynghoriad.