Pryder y bydd prinder nwyddau adeiladu yn parhau

Yn ôl yr FMB mae 82% o'u haelodau wedi gweld prisiau deunyddiau yn codi

Fe allai prinder mewn peth deunydd a nwyddau adeiladu barhau tan yr haf, yn ôl dau sefydliad sy'n cynrychioli'r diwydiant.

Mae Ffederasiwn y Masnachwyr Nwyddau Adeiladu (BMF) a Chymdeithas y Nwyddau Adeiladu (CPA) yn rhybuddio hefyd y gallai hyn arwain at oedi a phrisiau uwch.

Ar hyn o bryd mae nwyddau fel sment, coed dur, slatiau llechi to, briciau a nwyddau trydanol i'r stafell 'molchi yn brin iawn.

Mewn datganiad ar y cyd mae'r sefydliadau'n dweud fod cynnydd hefyd mewn galw, a bod hyn yn ei gwneud hi'n anodd i gyflenwyr a chynhyrchwyr sicrhau bod ganddyn nhw ddigon o stoc.

Mae'r sefyllfa hefyd yn cael effaith ar brisiau, ac yn ôl yr FMB mae 82% o'u haelodau wedi gweld prisiau'n codi.

Cyfnodau clo yn cael effaith

Yn rhannol, mae'r prinder oherwydd cynnydd mewn gwaith adeiladu a gwaith gwella tai yn ystod 2020, yn enwedig yn ystod y cyfnod clo cyntaf.

Roedd hyn yn ei dro wedi arwain at arafu cynhyrchu deunydd yn rhai ffatrïoedd yn yr Undeb Ewropeaidd, ac mae hyn wedi rhoi pwysau ar y gadwyn gyflenwi fyth ers hynny.

Mae Enzo Sauro yn rhagweld y bydd yn rhaid i adeiladwyr godi eu prisiau

Dwedodd Enzo Sauro o gwmni Sauro Homes yng Nghwm Gwendraeth bod nifer o fusnesau "dan bwysau ariannol o ganlyniad i'r ffaith bod yna brinder a phrisiau yn codi".

Mae ei gwmni e'n arbenigo mewn tai ffrâm pren.

"Mae llawer o'r coed yn dod o Sweden," meddai, "ac ar hyn o bryd yn mynd i America am eu bod nhw yn barod i dalu pris uwch ar y foment na beth ni yn ei dalu fan hyn.

"Felly yn anffodus bydd yn rhaid i brisiau godi yn y cwpl fisoedd nesaf."

Mae Mr Sauro hefyd yn bryderus y bydd yn rhaid i adeiladwyr godi eu prisiau o ganlyniad i hyn.

Dywedodd Daniel James bod rhaid archebu deunyddiau "wythnosau 'mlaen llaw"

Yn ôl Daniel James o DP Building Supplies Llanboidy ac Arberth, mae'n mynd yn "anoddach i gael gafael ar eitemau fel sment", ac maen nhw yn gorfod archebu "wythnosau 'mlaen llaw".

Ond dy'n nhw dal ddim yn sicr pryd fydd y llwyth nesaf yn cyrraedd.

O ran coed a phren, maen nhw'n archebu pedair wythnos ymlaen llaw, a dywedodd Mr James nad yw'n gweld "unrhyw arwydd fod y sefyllfa yn mynd i wella yn y tymor byr".