Aelod Senedd yr Alban yn tyngu llw yn Gymraeg

Cafodd yr aelod Ceidwadol, Rachael Hamilton ei geni yn Aberhonddu

Mae aelod o Senedd yr Alban wedi tyngu llw yn Gymraeg mewn seremoni yn Holyrood.

Mae Rachael Hamilton yn cynrychioli Ettrick, Roxburgh a Berwickshire ers 2017.

Fe gadwodd ei sedd yn gyfforddus yn etholiadau'r Alban yr wythnos ddiwethaf gyda 51.5% o'r bleidlais.

Cafodd yr aelod Ceidwadol ei geni yn Aberhonddu ond cafodd ei haddysgu yn Henffordd ac yn Sir Amwythig.

Yn 2008, daeth yn gyfarwyddwr y busnes lletygarwch teuluol sydd wedi'i leoli yn ne'r Alban.

Fore Iau, darllenodd y llw: "Yr wyf i yn tyngu y byddaf yn ffyddlon ac yn wir deyrngar i'w Mawrhydi y Frenhines Elizabeth yr Ail, ei hetifeddion a'i holynwyr, yn unol â'r gyfraith. Cynorthwyed Duw fi."

Mae aelodau wedi tyngu llw mewn ystod o ieithoedd fore Iau gan gynnwys BSL, Arabeg, Wrdw, Gaeleg ac Almaeneg.