Arestio dau wedi cyrch arfog yn Aberystwyth
- Cyhoeddwyd
Yr olygfa yng nghanol Aberystwyth yn gynnar nos Iau
Mae'r heddlu'n dweud y cafodd dau o bobl eu harestio wedi i blismyn arfog gynnal cyrch ar fflat yng nghanol Aberystwyth ddydd Iau.
Roedd yna apêl i'r cyhoedd gadw draw wrth i Heddlu Dyfed-Powys ddelio gyda "digwyddiad" arweiniodd at gau rhan o Heol Alexandra a Ffordd y Môr.
Dywedodd yr heddlu eu bod wedi derbyn adroddiadau am 17:30 bod dyn yn eistedd mewn ffenest gyda gwn yn ei ddwylo.
Fe wnaethon nhw ymateb gyda swyddogion arfog, wnaeth arestio dau ddyn.
Dywedodd y llu ddydd Gwener bod gwn sy'n saethu peledi bychan ac ychydig o ganabis wedi cael eu canfod yn y fflat.
Rhan o Ffordd y Môr ar gau
Mae un o'r dynion wedi cael ei ryddhau dan ymchwiliad tra bo'r ail wedi cael ei ryddhau heb gyhuddiad.
Dywedodd y llu eu bod yn gwerthfawrogi amynedd y cyhoedd tra'u bod yn delio gyda'r digwyddiad.