Ffordd osgoi Llandeilo 'ddim yn rhan o adolygiad'

Traffig yng nghanol Llandeilo

Mae wedi dod i'r amlwg na fydd penderfyniad i rewi cynlluniau adeiladu ffyrdd newydd yng Nghymru yn cynnwys cynllun ffordd osgoi ddadleuol yn y gorllewin wedi'r cyfan.

Ddydd Llun fe gadarnhaodd Llywodraeth Cymru fwriad i oedi pob cynllun newydd am y tro er mwyn cynnal adolygiad, ag eithrio prosiectau sydd eisoes wedi dechrau, fel ffordd Blaenau'r Cymoedd a ffordd osgoi Caernarfon.

Byddai hynny wedi dod â chynllun ffordd osgoi Llandeilo i stop tra bo'r weinyddiaeth yn ystyried effeithiau cynlluniau trafnidiaeth newydd ar ymdrechion i leihau allyriadau carbon.

Ond mae'r llywodraeth wedi cadarnhau bellach na fydd cynllun Llandeilo'n rhan o'r adolygiad.

Mae galw ers hanner canrif am ffordd osgoi yn Llandeilo

Cafodd cyhoeddiad ddydd Llun gan y Dirprwy Weinidog Newid Hinsawdd, Lee Waters ganmoliaeth gan yr ymgyrchydd amgylcheddol blaenllaw, Greta Thunberg.

Dywedodd Mr Waters bod rhaid "rhoi'r gorau i wario arian ar brosiectau sy'n annog mwy o bobl i yrru" i geisio cyrraedd targed statudol o allyriadau sero-net erbyn 2050.

Ond mae datganiad byr diweddaraf Llywodraeth Cymru'n awgrymu tro pedol yn achos cynllun ffordd osgoi Llandeilo.

Dywedodd llefarydd: "Yn dilyn datganiad y Dirprwy Weinidog Newid Hinsawdd ar 22 Mehefin, bydd ffordd osgoi Llandeilo, oedd yn rhan o'r cytundeb cyllidebol rhwng Plaid Cymru a'r Llywodraeth Lafur Cymru yn y Senedd flaenorol, ddim yn rhan o'r Adolygiad Ffyrdd."

Cytunodd y ddwy blaid ar y cynllun, sy'n werth £50m, yn ystod trafodaethau ynghylch y Gyllideb yn 2016.

Roedd y cynllun eisoes wedi ei oedi tan 2025 cyn cyhoeddiad dechrau'r wythnos.

Mae yna bwysau i godi ffordd osgoi yn Llandeilo ers hanner canrif oherwydd problemau traffig yng nghanol y dref a phryderon cynyddol ynghylch lefelau llygredd.