Heddlu'n ymchwilio ar ôl ymosodiad ar ddyn yng Nghaerdydd

Collodd Yang Wu ddant yn yr ymosodiad

Mae'r heddlu yn ymchwilio i ymosodiad homoffobaidd ar fyfyriwr yng Nghaerdydd.

Roedd Yang Wu, 27, yn cerdded gyda ffrind yn ystod oriau man y bore ar ddydd Iau 1 Gorffennaf pan aethon nhw i mewn i orsaf betrol ar Heol y Gadeirlan yn y brifddinas.

Yn ôl Mr Wu fe stopiodd tacsi tu allan i'r garej ac fe ddechreuodd un o'r teithwyr weiddi geiriau homoffobaidd tuag at y ddau cyn cerdded draw atyn nhw.

Fe ddechreuodd y dyn daflu pethau at y ddau ffrind yn ôl Mr Wu, ond roedd ei ffrind wedi meddwi gormod iddyn nhw geisio rhedeg i ffwrdd meddai.

Dywedodd Mr Wu iddo benderfynu herio'r person oedd yn ymosod arno, ond fe gafodd ei daro ar ei wyneb a disgynnodd i'r llawr.

"Cefais fy mwrw yn fy wyneb, ac mae fy nwylo a fy mhenelin wedi'u torri - mae fy nant wedi torri a chollais i ddant hefyd", meddai Mr Wu.

"Fe wnaeth yr ymosodwr a dyn arall ddianc mewn tacsi. Mae'r heddlu yn ymchwilio ac yn ceisio adnabod yr ymosodwyr trwy ddefnyddio lluniau camerâu cylch cyfyng."

'Ofn mynd allan yn y nos'

Dywedodd y dyn o China sy'n astudio ym Mhrifysgol Caerdydd ei fod o wedi cael braw wrth weld y dynion yn cerdded o'r tacsi.

Cafodd ei gludo i'r ysbyty wedi'r digwyddiad, ond mae'n debyg y bydd wedi colli ei ddant yn barhaol.

Mae'n dweud ei fod yn dal i gael trafferth siarad ac mewn poen. Mae hefyd yn dweud ei fod wedi gwneud iddo ystyried newid ei edrychiad, ac mae ganddo ofn mynd allan yn y nos.

Dywedodd Iestyn Wyn bod camdriniaeth o'r fath yn "drychinebus"

Mae elusen Stonewall wedi disgrifio'r digwyddiad fel un "torcalonnus".

"Mae'n drychinebus i'r rhai sy'n cael eu targedu gyda'r fath gasineb. Mae'r cwestiwn o pam bod hyn yn dal i ddigwydd yma yn gwestiwn i'r bobl sy'n dewis taflu casineb o fewn y gymuned LGBT+", meddai Iestyn Wyn, llefarydd Stonewall Cymru.

"Rydyn ni yn ymwybodol bod yna fwy o bobl yn teimlo bod ganddyn nhw hawl i fod yn gas tuag at eraill o fewn ein cymdeithas ni.

"Tra bod hynny'n digwydd mae'n bwysig i sefydliadau fel Stonewall ac eraill i sefyll i fyny'n gadarn a dweud nad ydy hyn yn dderbyniol ym Mhrydain na Chymru chwaith."

Cafodd yr ymosodiad ei gofnodi ar gamera cylch cyfyng y garej, ac mae Heddlu De Cymru yn trin y digwyddiad fel trosedd casineb.

Mae'r heddlu yn chwilio am ddyn 5'9" hil gymysg gyda phen moel a dillad tywyll.

Mae swyddogion yn apelio ar i unrhyw un sydd â gwybodaeth all fod o gymorth i'r ymchwiliad i gysylltu â nhw.