Heddlu'n enwi bachgen fu farw yn Afon Ogwr ger Pen-y-bont

Mae ditectifs wedi cadarnhau enw'r bachgen pump oed y cafwyd hyd i'w gorff yn Afon Ogwr ar gyrion Pen-y-bont fore Sadwrn.

Roedd Logan Mwangi, sydd hefyd yn cael ei adnabod fel Logan Williamson, o ardal Sarn.

Mae ffrindiau teuluol wedi rhoi teyrngedau iddo ar y cyfryngau cymdeithasol gan ei ddisgrifio fel bachgen "caredig, doniol, cwrtais, hardd a chlyfar".

Dywedodd Heddlu De Cymru nos Sul eu bod wedi arestio dyn 39 oed, menyw 30 oed a bachgen 13 oed ar amheuaeth o lofruddiaeth.

Mae'r llu hefyd yn dweud nad ydyn nhw'n chwilio am unrhyw un arall mewn cysylltiad â'r digwyddiad.

Cafodd y gwasanaethau brys eu galw am 05:45 bore Sadwrn yn dilyn adroddiadau fod plentyn ar goll yn ardal Sarn.

Cafodd Logan ei gludo i Ysbyty Tywysoges Cymru ym Mhen-y-bont ond daeth cadarnhad yn ddiweddarach ei fod wedi marw.

Mae ymholiadau'n parhau i geisio cadarnhau sut y daeth Logan i fod yn yr afon ac mae'r llu'n apelio am wybodaeth gan unrhyw dystion posib oedd yn yr ardal am 05:45 fore Sadwrn.

Mae teganau wedi eu gadael er cof am Logan ger yr ardal ger Agon Ogwr

Dywedodd y Prif Arolygydd Geraint White ei fod yn "ddigwyddiad trasig", gan apelio am wybodaeth gan unrhyw un allai fod wedi gweld y digwyddiad.

"Rydym yn gofyn i'r cyhoedd beidio trafod yr achos ar wefannau cymdeithasol gan fod yr ymchwiliad yn parhau", meddai.

"Os oes gyda chi wybodaeth allai helpu, rhowch wybod i ni."

Ychwanegodd bod swyddogion heddlu arbenigol "mewn cysylltiad cyson" gyda theulu Logan.

"Mae hwn yn ymchwiliad eang a sensitif ac mae llawer o bobl wedi eu heffeithio gan y farwolaeth yma."