Aur i Hannah Mills yn yr hwylio yn Tokyo

Roedd Hannah Mills ac Eilidh McIntyre wedi rheoli'r gystadleuaeth yn Enoshima o'r dechrau

Mae'r Gymraes Hannah Mills wedi ennill medal aur i dîm Prydain, gyda'i phartner Eilidh McIntyre, yn yr hwylio yng Ngemau Olympaidd Tokyo.

Mills, o Gaerdydd, bellach ydy'r hwylwraig fwyaf llwyddiannus erioed yn y Gemau Olympaidd wedi iddi ennill yng nghystadleuaeth y dosbarth 470 ddydd Mercher.

Daw hynny wedi iddi ennill medal arian yn yr un gystadleuaeth yn Llundain yn 2012, ac aur yn Rio yn 2016.

• Medalau aur cyntaf i Gymry yn Tokyo

• Medal arian Olympaidd i Elinor Barker

• Arian i Lauren Williams yn y taekwondo yn Tokyo

• Lauren Price yn saff o fedal efydd yn y bocsio

Roedd Mills a McIntyre wedi rheoli'r gystadleuaeth yn Enoshima o'r dechrau, gan ennill dau gymal, ac roedd gorffen yn bumed yn y ras olaf yn ddigon i selio'r fedal aur.

Roedd rhaid aros am gadarnhad o'r canlyniad yn dilyn protest gan dîm Ffrainc ar ddiwedd y ras, ond cafodd hynny ei wrthod gan swyddogion.

Mae'n golygu bod Gwlad Pwyl yn cael arian, a Ffrainc yn cael y fedal efydd.