Cwmni'n helpu glanhau llygredd llongddrylliad yn yr UDA

Mae'r Golden Ray ar ei hochr ers dwy flynedd

Mae cwmni o Sir Gâr yn helpu i drin mwd llygredig yng ngweddillion llong gargo wnaeth droi drosodd yn y môr oddi ar arfordir yr Unol Daleithiau ddwy flynedd yn ôl.

Roedd y Golden Ray yn cludo tua 4,200 o gerbydau pan aeth i drafferthion ger Ynys St Simons oddi ar arfordir Georgia yn fuan ar ôl gadael porthladd Brunswick.

Wrth i'r llong gael ei thorri'n ddarnau er mwyn ei symud, cwmni Hydro Industries o Langennech fydd yn symud a glanhau olew o'r llongddrylliad.

Fe adawodd sawl cynhwysydd llawn offer arbenigol, sydd wedi'i ddatblygu yng Nghymru, y DU am yr Unol Daleithiau ddydd Mercher.

Tua mil o'r cerbydau sydd wedi eu tynnu hyd yma o'r dŵr neu o grombil y llong 656 troedfedd o hyd, sydd wedi ei chofrestru yn Ne Corea.

Gan ei bod mor fawr, rhaid torri'r Golden Ray yn wyth darn, sy'n pwyso 3,720 tunnell fetrig yr un.

Cyn gwneud hynny, cafodd y rhan fwyaf o'r tanwydd ar ei bwrdd ei ddraenio, ond mae yna amcangyfrif bod hyd at 44,000 o alwyni - neu 166,500 o litrau - yn dal ar ôl.

Dywed yr awdurdodau adnoddau naturiol yn Georgia bod "yr effaith i'r amgylchedd yn llai sylweddol nag yr oedden ni wedi'i ofni", gyda gollyngiadau cymharol fân o olew wrth dorri'r cysylltiad i linell tanwydd ger ystafell yr injan.

Mwd 'trwchus ac annymunol'

Puro dŵr sydd wedi ei lygru yw arbenigedd cwmni Hydro Industries. Mae wedi helpu i lanhau llygredd ar draws y byd, boed yn sgil y diwydiannau olew a nwy, cloddio neu o longddrylliadau.

Y nod nawr yw ceisio atal "trychineb amgylcheddol" dros 4,000 o filltiroedd i ffwrdd oddi ar arfordir Georgia.

Hydro Industries yw un o'r ychydig gwmnïau ledled y byd all wneud y gwaith, medd Wayne Preece

"Ar y llong yna mae yna fwd gydag olew llygredig," medd prif weithredwr y cwmni, Wayne Preece. "Mae'n eithaf trwchus, yn stwff eithaf annymunol.

"Rydym wedi cael y gwaith o drin tua miliwn o alwyni ohono - ei symud o'r llong, ei drin, dychwelyd dŵr yn ddiogel i'r môr, ac yna casglu'r olew."

Mae cwmni Hydro wedi delio gyda llongddrylliadau yn Ffrainc, Yr Almaen, Awstralia a Japan ond dyma'r prosiect mwyaf yn ei hanes.

"Ni yw un o'r ychydig gwmnïau all wneud e," meddai Mr Preece.

Gweithwyr yn safle Hydro Industries yn Sir Gâr

Fe gymerodd bythefnos i lwytho'r offer ar gyfer y gwaith, sy'n edrych fel bath anferthol, ar hen safle milwrol yn Llangennech.

Mae'r daith fel arfer yn cymryd rhwng pump a chwe wythnos ond bydd Gwylwyr y Glannau'r Unol Daleithiau yn cyflymu'r broses gan hebrwng y llwyth i'r porthladd.

"Bydd yn cyrraedd Atlanta mewn oddeutu tair wythnos a bydd ein tîm ar awyren yn aros amdano," meddai Mr Preece. "Fe wnawn ni ei ddefnyddio'n syth a bydd yn oddeutu mis o waith."

Mae'r broses glanhau'n "glyfar ond syml", medd y peiriannydd amgylcheddol, Caitlin Davies

"Mae'n defnyddio system sy'n caniatáu i'r olew gael ei wahanu rhag y dŵr," eglurodd un o beirianwyr amgylcheddol Hydro Industries, Caitlin Davies.

"Mae rhoi gwefr alwminiwm ar yr electrodau yn ceulo'r gronynnau llai yn ronynnau mwy.

"Mae'n ateb gwirioneddol glyfar ond syml."