Chelsea Flower Show: 'Mae ganddo ni 2000 o cocktail sticks i osod y tomatos a'r radish'
- Cyhoeddwyd
Mae angen ymroddiad i dyfu llysiau'r ardd ond i ennill gwobr yn un o sioeau enwoca'r byd mae angen misoedd o waith tyfu, wythnos o gynaeafu a golchi, tridiau o osod - a 2000 o ffyn coctel.
Dyna sut wnaeth y garddwr o Fôn Medwyn Williams lwyddo i gael ei 13eg gwobr aur yn y RHS Chelsea Flower Show yr wythnos yma.
Y digrifwr Bill Bailey gyda Medwyn Williams o flaen ei arddangosfa
Dechreuodd ar y gwaith paratoi naw mis yn ôl, gan ddechrau tyfu nionod cyn y Nadolig, ac amseru plannu degau o lysiau eraill dros y flwyddyn i wneud yn siŵr eu bod yn barod erbyn mis Medi.
Wythnos cyn y sioe mae'n dechrau cynaeafu, gyda'r llysiau caled fel tatws a betys yn cael eu codi gyntaf gan nad ydi nhw'n difetha mor gyflym. Mae'n cynaeafu a glanhau popeth dros y dyddiau nesaf a'u cadw'n ofalus gan ddewis dim ond y gorau i'w harddangos.
"Unrhywbeth o dan y pridd, fel moron, mae'n anodd gwybod os ydi nhw'n rhai da cyn eu codi nhw - dwi'n deud yn aml faswn i'n licio cael llygaid x-ray," meddai Medwyn.
"Maen nhw'n cael eu trin fel babis - 'da ni'n eu golchi nhw, rhoi papur gwlyb o'u cwmpas i gadw nhw'n ffresh. Mae 'na 42 gwahanol fath o lysiau wedyn yn mynd lawr i Lundain mewn dwy fan."
A dyna pryd mae'r gwaith manwl yn dechrau.
Mae'r paratoi yn cynnwys gwaith cerfio delweddau mewn pwmpen
Dywedodd Medwyn o'r sioe ar ôl derbyn ei fedal aur: "Unwaith 'da ni lawr yma, mae'n 12 awr bob dydd, o ddydd Gwener tan ddydd Sul i gael bob dim yn barod ac mae 'na bump ohonon ni yma. Mae ganddo ni 2000 o cocktail sticks i osod pethau fel y tomatos a'r radish."
"Mae'n waith caled. Fydda i'n 80 flwyddyn nesa a beryg mai hwn fydd fy nhro ola' yn cystadlu yma."
Haeddu medal... yr arddangosfa yn ei holl ogoniant
Y cerddor a'r cyflwynydd Cerys Matthews a David Myers, o'r Hairy Bikers, gyda Medwyn
Ond os mai dyma fydd ei dro olaf, mae ei waith da yn parhau - gan fod ei ŵyr Richard wedi bod yn ei helpu yn Chelsea eleni am y tro cyntaf. Mae gan Medwyn or-ŵyr hefyd sy'n dangos diddordeb ac yntau'n chwech oed.
"Wnaeth o helpu golchi'r llysiau ac roedd o'n ddŵr i gyd, ond fel yna neshi ddysgu gan fy nhad pan o'n i tua'r un oed. Gobeithio neith o barhau - alli di ddim ond agor y giât iddyn nhw."
Medwyn gyda Richard ei ŵyr, a'r fedal aur
Hefyd o ddiddordeb:
Bydd Medwyn Williams ar raglen Galwad Cynnar Radio Cymru ddydd Sadwrn 25 Medi