Rhagbrofol Cwpan y Byd 2022: Estonia 0-1 Cymru

Er ei gôl, ni fydd Kieffer Moore ar gael i herio Belarws fis nesaf wedi iddo gael cerdyn melyn

Fe lwyddodd Cymru i drechu Estonia oddi cartref nos Lun er gwaethaf perfformiad sigledig, gan gadw eu gobeithion o orffen yn ail yn eu grŵp rhagbrofol yn eu dwylo eu hunain.

Gyda Sorba Thomas, Harry Wilson a Connor Roberts yn dod i mewn i'r tîm, roedd hi'n amlwg mai ymosod oedd y flaenoriaeth i dîm Rob Page yn Tallinn.

Er i Danny Ward orfod gwneud arbediad o fewn y munud cyntaf, fe wnaeth Cymru gymryd rheolaeth o'r gêm am y cyfnod wedi hynny, gyda'r golwr Karl Jakob Hein yn arbed yn dda o ergyd Connor Roberts.

Ond o'r gic gornel fe ddaeth unig gôl y gêm, gyda Kieffer Moore yn manteisio ar flerwch yn y cwrt cosbi i sgorio'n hawdd wedi 12 munud.

Yn fuan wedi hynny fe gafodd Cymru ddihangfa, gyda Harry Wilson bron â rhoi gôl ar blât i'r tîm cartref, cyn i gyfuniad o Ward a Joe Rodon lwyddo i gadw'r bêl rhag croesi'r llinell gôl.

Roedd gôl flêr Kieffer Moore yn adlewyrchiad o'r gêm yn ehangach

Roedd Cymru'n edrych yn sigledig ar adegau am weddill yr hanner cyntaf, ac fe ddaeth cyfle da arall i Estonia ar ddechrau'r ail hanner wrth i beniad Erik Sorga o gic rydd fynd dros y trawst o drwch blewyn.

Fe welodd Moore gerdyn melyn hefyd yng nghanol yr ail hanner, sy'n golygu na fydd ar gael i herio Belarws fis nesaf.

Bu'n rhaid i Ward arbed yn dda o ergyd Vlasiy Sinyavskiy gyda chwarter awr yn weddill er mwyn cadw Cymru ar y blaen yn erbyn tîm sydd 92 safle yn is yn netholion y byd.

Er i Estonia bwyso am yr amser oedd yn weddill, fe lwyddodd Cymru i ddal eu gafael yn y fuddugoliaeth a sicrhau triphwynt pwysig.

Roedd Cymru'n edrych yn sigledig ar adegau, ond fe lwyddon nhw i ddal eu gafael yn y fuddugoliaeth

Yn y gêm arall yng Ngrŵp E nos Lun fe lwyddodd y Weriniaeth Tsiec i ennill o 2-0 ym Melarws, sy'n golygu bod Cymru'n aros yn y trydydd safle, tu ôl i'r Weriniaeth ar wahaniaeth goliau ond wedi chwarae un gêm yn llai.

Mae gan Wlad Belg fantais o bum pwynt ar y brig, sy'n golygu fod gorffen yn gyntaf bron yn amhosib i Gymru.

Y gemau ail-gyfle ydy'r llwybr mwyaf tebygol i Gwpan y Byd Qatar felly.

Er bod Cymru bron yn siŵr o gyrraedd y rheiny oherwydd eu perfformiad yng Nghynghrair y Cenhedloedd, mae'n dal yn bwysig iddynt anelu at gipio'r ail safle yn y grŵp.

Trwy orffen yn ail fe fyddai gan Gymru lwybr haws trwy'r gemau ail-gyfle, ac fe fydden nhw hefyd yn chwarae o flaen cefnogaeth y Wal Goch gartref.

Bydd Cymru'n herio Belarws a Gwlad Belg gartref fis nesaf, tra bo'r Weriniaeth Tsiec ag un gêm yn unig yn weddill, yn erbyn Estonia.