Ateb y Galw: Y delynores Meinir Olwen
- Cyhoeddwyd
Y delynores Meinir Olwen sy'n Ateb y Galw yr wythnos yma ar ôl iddi gael ei henwebu gan Cerys Hafana yr wythnos diwethaf.
Telynores ac ieithydd o ardal Aberystwyth yw Meinir Olwen. Mae'n aelod o Avanc, band gwerin ieuenctid Cymru, ac yn cynnal ymchwil ynglŷn â'r broses o ddysgu ieithoedd ym Mhrifysgol Bangor.
Beth ydi dy atgof cyntaf?
Eistedd yn y stafell ffrynt yn gwylio Cymru'n curo De Affrica yn y gêm rygbi gyntaf yn Stadiwm y Mileniwm ar y teledu.
Neil Jenkins oedd fy arwr pan o'n i'n dair!
Dy hoff le yng Nghymru a pham?
Traeth Y Borth. Ma' 'na rywbeth hudolus am grwydro drwy'r goedwig foddedig ar noson glir a gwylio'r haul yn machlud dros Ynys Enlli.
Meinir ar draeth Borth
Pa ddigwyddiad yn dy fywyd sy' o hyd yn 'neud i ti wenu neu chwerthin pan ti'n meddwl nôl?
Dringo Moel Hebog yn yr eira gyda phobl barchus y Clwb Mynydda. Cyrraedd y copa a llithro lawr i'r bwlch ar ein penolau!
Beth oedd y digwyddiad a gododd y mwya' o gywilydd arnat ti erioed?
Brexit.
O archif Ateb y Galw:
Disgrifia dy hun mewn tri gair.
Chwilfrydig, penstiff, sarcastig.
Pryd oedd y tro diwethaf i ti grïo?
Sai'n un sy'n crio'n aml.
Ond roedd gwrando ar Shaharzad Akbar, ymgyrchydd hawliau dynol o Afghanistan, yn trafod dyfodol ei gwlad ar y podlediad A Wish for Afghanistan yn ysgytwol.
Oes gen ti unrhyw arferion drwg?
Anghofio ateb negeseuon - sori!
Y noson orau i ti ei chael erioed?
Gormod i'w henwi - ond ma'n siŵr bod 'na lwyth o gerddoriaeth, ffrindiau a chwerthin!
Beth yw dy hoff lyfr, ffilm neu bodlediad a pham?
Dwi'n dwli ar ddysgu am hanes ac mae'r podlediad You're dead to me yn wych.
Dwi hefyd eisiau cyfres arall o Dim rŵan na nawr - mae angen i ni wybod am ein hanes ni'n hunain.
Pa lun sy'n bwysig i ti a pham?
Dau berson dwi'n eu caru'n fawr iawn: Mam-gu ac Iwan, fy mrawd mawr.
Petaset ti'n gallu bod yn rhywun arall am ddiwrnod, pwy fyddai ef/hi?
Sai'n siŵr am y syniad o fod yn berson arall. Ond fe fyddai bod yn aderyn i gael hedfan uwchben pawb a phopeth yn anhygoel!
Dyweda rywbeth amdanat ti dy hun nad oes yna lawer o bobl yn ei wybod.
Nes i chwarae'r cello ar ail albwm Bwncath.
Ar dy ddiwrnod olaf ar y blaned, beth fyddet ti'n ei wneud?
Nofio yn y môr, wedyn canu a chwarae cerddoriaeth rownd coelcerth dan y sêr gyda'n ffrindie a fy nheulu.
Byw neu farw, gyda phwy fyddet ti'n cael diod?
Gwerful Mechain - rhaid ei bod hi'n gymeriad a hanner!
Gwerful Mechain yw'r unig fardd benywaidd canoloesol Cymraeg sydd gyda casgliad sylweddol o waith wedi goroesi ohono
Pwy sydd yn Ateb y Galw wythnos nesaf?
Sarah Cooper
