Arddangosfa angylion i gofio'r rhai fu farw o Covid-19

Mae'r arddangosfa yn agor ddydd Sul ac ar agor tan y flwyddyn newydd

Mae arddangosfa arbennig o angylion wedi agor mewn eglwys yn Wrecsam i gofio am y miloedd sydd wedi marw o Covid-19.

Dros y flwyddyn ddiwethaf mae caredigion Eglwys y Plwyf San Silyn wedi cynhyrchu 6,000 o angylion o bob lliw a llun.

Mae'r angylion wedi cael eu hongian mewn rhwydi sy'n hongian i fyny mewn tŵr a chorff yr eglwys a byddan nhw yna tan fis Ionawr.

Dywedodd y Parchedig James Tout bod angylion yn cynrychioli gobaith a golau

Dywedodd y Parchedig James Tout wrth Cymru Fyw: "Mae pob angel yn cynrychioli rhywun sydd wedi marw gyda Covid 19. Mae wedi bod yn ymdrech massive.

"Mae wedi cymryd oriau ac oriau i bob aelod o'r Eglwys a phobl o'r gymuned sydd ddim yn rhan o'n heglwys ni i greu'r angylion 'ma ac i roi nhw i fyny i gofio am y bobl sydd wedi marw dros yr 18 mis dwetha' 'ma.

"Mae angylion, ar gyfer Cristnogion, wedi cynrychioli gobaith a golau dros y canrifoedd mawr."

Mae'r angylion wedi'u creu o ddeunyddiau newydd ac sydd wedi'u hailgylchu

Mae'r angylion yn cynrychioli'r holl bobl sydd wedi marw o Covid-19

Cafodd yr arddangosfa ei hysbrydoli gan angylion cerddorol o'r 15fed Ganrif sydd wedi eu cerfio mewn i do pren yr eglwys.

Mae pob angel yn cynrychioli bywyd a gafodd ei golli ac maen nhw wedi cael eu creu gyda phapur sydd naill ai'n newydd neu sydd wedi ei ailgylchu, gwlân a deunyddiau eraill.

Bydd yr arddangosfa i'w gweld yn Eglwys San Silyn tan 6 Ionawr.