Achub dyn fu'n sownd mewn ogof ers dydd Sadwrn

Achub

Cafodd y dyn ei gludo o'r safle mewn ambiwlans 4x4 y timau achub

Mae dyn wedi ei achub o ogof ym Mannau Brycheiniog ar ôl bod yn sownd ers dydd Sadwrn.

Mae cannoedd o achubwyr wedi bod yn gweithio i gludo'r dyn i'r wyneb o ogofâu Ffynnon Ddu ger Ystradgynlais.

Dywedodd achubwyr bod y dyn wedi ei anafu, ond nad yw'r anafiadau'n peryglu ei fywyd.

Er bod y dyn sydd wedi ei achub yn ogofäwr profiadol, mae timau achub wedi dweud ei fod yn "ffodus" i fod yn fyw ar ôl disgyn dan ddaear.

Tîm Achub Ogof Canolbarth a De Cymru

Roedd y timau achub yn gweithio mewn sifftiau i symud y dyn o'r ogof

Ychwanegodd y tîm achub fod y dyn yn ei 40au canol, a'i fod mewn "hwyliau da".

Cafodd ei gludo o'r safle mewn ambiwlans 4x4 y timau achub, ac mae disgwyl iddo gael ei gymryd i Ysbyty Treforys yn Abertawe.

Dywedodd Gary Evans, fu'n rhan o'r ymgyrch i achub y dyn, ei fod yn "gwneud yn rhyfeddol o dda o ystyried pa mor hir mae e wedi bod yn yr ogof, wedi bod ar y stretcher".

"Mae'n gwneud yn dda iawn. Ry'n ni wrth ein boddau oherwydd roedd e'n ymgyrch anodd.

"Roedd cymaint o dimau gwahanol yn rhan ohono - nifer o asiantaethau gwahanol - ac mae hi wedi mynd mor dda yn gweithio gyda'n gilydd.

"Mae hynny'n destun balchder mawr i ni gyd."

Tîm Achub Ogof Canolbarth a De Cymru

Dywedodd y gwasanaethau brys fod dros 250 o bobl wedi bod yn rhan o'r ymgyrch

Cafodd y gwasanaethau brys eu galw gan ogofäwr arall am tua 14:30 ddydd Sadwrn.

Bu o leiaf wyth o dimau achub o bob cwr o'r Deyrnas Unedig yn cynorthwyo'r ymdrech i ddod â'r gŵr i'r wyneb.

Nid yw’r post yma ar Twitter yn gallu ymddangos yn y porwr. Os gwelwch yn dda defnyddiwch Javascript neu geisio eto ar borwr gwahanol.Gweld y cynnwys gwreiddiol ar Twitter.
Nid yw'r BBC yn gyfrifol am gynnwys safleoedd allanol
I osgoi neges twitter gan Rhys Williams

Caniatáu cynnwys Twitter?

Mae’r erthygl hon yn cynnwys deunydd gan Twitter. Gofynnwn am eich caniatâd cyn llwytho unrhyw beth, gan y gallai Twitter ddefnyddio cwcis neu dechnoleg arall. Mae’n bosib eich bod am ddarllen polisi cwcis Twitter a pholisi preifatrwydd cyn derbyn. Er mwyn gweld y cynnwys dewiswch ‘derbyn a pharhau’.

Nid yw'r BBC yn gyfrifol am gynnwys safleoedd allanol

Dywedodd y gwasanaethau brys brynhawn Llun fod dros 250 o bobl wedi bod yn rhan o'r cyrch.

Dyma'r ymgyrch hiraf erioed gan dimau de Cymru i achub person o ogof - 41 awr oedd yr hiraf cyn y digwyddiad yma.

Trwy'r fynedfa hon - un o dair i ogofâu Ffynnon Ddu - aeth yr ogofäwr cyn cael ei anafu dan ddaear

Mae ogofeydd Ffynnon Ddu, sydd wedi eu dynodi'n warchodfa natur, ymhlith yr hiraf yn y DU, a dyma hefyd yr ogofeydd dyfnaf yn y DU â bron 300m o ddyfnder.

Maen nhw'n boblogaidd ymhlith ogofwyr ond ar safle sy'n cael ei argymell ar gyfer unigolion profiadol.

Straeon perthnasol