Y Gynghrair Genedlaethol: Aldershot 0-5 Wrecsam

Mae Wrecsam wedi codi i'r nawfed safle yn y Gynghrair Genedlaethol yn dilyn buddugoliaeth gyfforddus oddi cartref yn Aldershot nos Fawrth.

Aeth y Cymry ar y blaen wedi 40 munud o chwarae wrth i'r amddiffynnwr Aaron Hayden benio tafliad hir Ben Tozer i gefn y rhwyd.

Dyblwyd y fantais funudau'n unig yn ddiweddarach wrth i Harry Lennon sgorio yn dilyn ansicrwydd yn y cwrt cosbi.

Aeth yr ymwelwyr ymhellach ar y blaen yng nghanol yr ail hanner wrth i Reece Hall-Johnson a Jordan Ponticelli sgorio o fewn tri munud i'w gilydd.

Ychwanegodd Jordan Davies bumed gydag 20 munud yn weddill er mwyn selio buddugoliaeth swmpus i dîm Phil Parkinson.

Cafodd y gêm wreiddiol rhwng y ddau dîm ei gohirio fis diwethaf oherwydd bod cymaint o ddŵr ar y cae yn dilyn glaw trwm.

Roedd Wrecsam yn ennill y gêm honno o 2-0 pan benderfynodd y dyfarnwr nad oedd modd parhau wedi 52 munud o chwarae.