Qatar 2022: Dim Gareth Bale i Gymru i herio Gwlad Belg

Fe chwaraeodd Gareth Bale 45 munud ar achlysur ei 100fed cap nos Sadwrn

Ni fydd capten Cymru Gareth Bale ar gael yng ngêm ragbrofol Cwpan y Byd yn erbyn Gwlad Belg wrth iddo barhau i wella o anaf.

Mae Cymru'n chwarae'r tîm sydd ar frig rhestr detholion y byd nos Fawrth gan wybod y byddai pwynt yn sicrhau - fwy neu lai - gêm gartref yn y gêm ail gyfle ym mis Mawrth.

Cafodd Bale, 32, ei eilyddio ar hanner amser yn y fuddugoliaeth 5-1 yn erbyn Belarws ddydd Sadwrn, rhywbeth oedd "wedi'i gynllunio" ymlaen llaw, meddai wedyn.

Roedd Cymru eisoes yn sicr o le yn y gemau ail gyfle ar gyfer Qatar 2022 ar ôl ennill eu grŵp yng Nghynghrair y Cenhedloedd ac wedi i Sbaen drechu Groeg nos Iau.

Sawl un ar gerdyn melyn

Roedd y rheolwr Robert Page wedi dweud mai unig obaith seren Real Madrid o ymddangos yn erbyn Gwlad Belg oedd fel eilydd, cyn iddi ddod i'r amlwg fore Mawrth nad oedd wedi'i enwi yn y garfan o 23 ar gyfer y gêm.

Ond mae disgwyl i Aaron Ramsey, a sgoriodd ddwywaith nos Sadwrn ac sy'n debygol o arwain y tîm yn absenoldeb Bale, i fod yn holliach.

Mae ymosodwr Caerdydd, Kieffer Moore hefyd yn debygol o ddechrau ar ôl iddo fethu'r gêm yn erbyn Belarws oherwydd gwaharddiad.

Yn hynny o beth, mae nifer o chwaraewyr Cymru ar gerdyn melyn - byddai un arall yn erbyn Gwlad Belg felly yn golygu na fyddan nhw ar gael ar gyfer y gêm ail gyfle ymhen pedwar mis.

Ramsey, Joe Allen, Joe Morrell, Harry Wilson, Sorba Thomas, Chris Gunter a James Lawrence sydd eisoes ar felyn.

Ni fydd Ethan Ampadu ar gael ar gyfer y gêm nos Fawrth chwaith ar ôl iddo yntau weld cerdyn melyn yn erbyn Belarws.

• Joe Ledley yn ymddeol o bêl-droed proffesiynol

Roedd Aaron Ramsey yn wych nos Sadwrn, er nad yw wedi chwarae rhyw lawer i Juventus yn ddiweddar

"Nid oedd byth yn mynd i ddechrau [yn erbyn Gwlad Belg]," meddai Page am Bale ddydd Llun.

"Nid yw wedi chwarae ers cwpl o fisoedd ac roedd ei daflu i mewn ar gyfer y gêm honno yn ofyn mawr o safbwynt corfforol."

Nifer yn absennol i'r Belgiaid

Wrth siarad ar ôl buddugoliaeth ddydd Sadwrn, gwrthododd Bale awgrymiadau ei fod wedi cael anaf yn ystod y gêm yn Stadiwm Dinas Caerdydd a dywedodd ei fod yn disgwyl wynebu Gwlad Belg.

Mae Kieffer Moore wedi sgorio saith gôl ers gwneud ei ymddangosiad cyntaf ym mis Medi 2019, mwy nag unrhyw chwaraewr arall o Gymru yn yr amser yna.

Dywedodd Page: "Mae Kieffer yn chwaraewr gwych. Mae'n rhan fawr o'r hyn rydyn ni am ei wneud ac yn bendant fe fydd yn ymddangos."

Mae nifer o chwaraewyr Gwlad Belg yn absennol, ond mae Kevin De Bruyne (blaen) ar gael

Mae Cymru'n ail yng Ngrŵp E, dri phwynt ar y blaen i'r Weriniaeth Siec sydd yn y trydydd safle, ac yn wynebu Estonia ddydd Mawrth.

Gall dynion Robert Page sicrhau'r ail safle gyda gêm gyfartal gartref i Wlad Belg.

Os bydd Cymru a'r Weriniaeth Siec yn gorffen ar yr un pwyntiau, bydd yr ail safle yn mynd i'r tîm gyda'r gwahaniaeth goliau gorau neu, ar ôl hynny, y tîm gyda'r mwyafrif o goliau a sgoriwyd.

Ar hyn o bryd mae gan Gymru wahaniaeth goliau dau yn well na'r Sieciaid, gan sgorio un gôl yn fwy.

Mae Gwlad Belg eisoes wedi sicrhau'r mai nhw fydd y gorffen ar frig Grŵp E, ond bydd y rheolwr Roberto Martinez heb nifer o'i chwaraewyr profiadol ar gyfer y gêm.

Ymhlith y rhai sydd heb deithio i Gaerdydd mae Romelu Lukaku, Youri Tielemans, Eden Hazard, Thibaut Courtois, Simon Mignolet, Jason Denayer, Jeremy Doku, Michy Batshuayi, Toby Alderweireld a Thomas Vermaelen.