Y fodrwy briodas yng nghacen gri Cliff Jones
- Cyhoeddwyd
Mae cyn-asgellwr Abertawe a Tottenham Hotspur, Cliff Jones, yn cael ei ystyried gan lawer fel un o'r pêl-droedwyr gorau erioed o Gymru. Roedd yn un o sêr tîm Cymru yng Nghwpan y Byd 1958 ac fe gynrychiolodd ei wlad 59 gwaith rhwng 1954 ac 1969.
Mae'n byw yng ngogledd Llundain ers ei ddyddiau yn chwarae pêl-droed, ond mae'n dal i fwynhau bwyd o'i famwlad.
Ond fe gafodd Cliff sioc enfawr nos Lun wrth ddarganfod modrwy briodas Joyce Medwin yn ei gacen. Mae Joyce yn wraig i Terry Medwin, hen gyfaill i Cliff a chyn-gyd-chwaraewr yn ei ddyddiau ag Abertawe, Tottenham Hotspur a Chymru.
Caniatáu cynnwys X?
Mae’r erthygl yma’n cynnwys elfennau sydd wedi eu darparu gan X. Gofynnwn am eich caniatâd cyn eu llwytho, oherwydd fe allai wneud defnydd o cwcis a thechnolegau eraill. Efallai y byddwch am ddarllen polisi cwcis X, dolen allanol a pholisi preifatrwydd, dolen allanol cyn derbyn. I weld y cynnwys yma dewiswch ‘derbyn a pharhau’.
Fe wnaeth Joyce bobi'r cacenni a'u rhoi i Cliff a'i wraig ar brynhawn dydd Sul pan wnaethant gyfarfod i weld gêm Spurs yn erbyn Leeds United.
Rhoddodd Joyce ddwsin o gacenni cri i Cliff, ac yn y cyntaf iddo frathu fe deimlodd darn o fetel caled rhwng ei ddannedd.
Cliff Jones yn chwarae dros Tottenham Hotspur yn erbyn Aresenal - 22 Chwefror, 1958
Roedd Joyce mewn tipyn o banic dros y penwythnos wedi iddi sylwi bod modrwy briodas ei mam, yr oedd hi'n ei wisgo bob dydd, wedi diflannu.
Ond fe drodd y siom yn orfoledd wedi iddi gael galwad ffôn gan Cliff yn dweud ei fod wedi ffeindio'r fodrwy.
Dau alarch yng ngogledd Llundain; Terry Medwin a Cliff Jones yn eu dyddiau yn chwarae dros Tottenham Hotspur
Mae cyfeillgarwch Cliff Jones a Terry Medwin yn dyddio nôl 70 o flynyddoedd, pan oedd y ddau'n chwaraewyr ifanc dros Tref Abertawe (Swansea Town) fel oedd y clwb y dyddiau hynny.
Ymunodd Terry â'r Elyrch yn 1949, gyda Cliff yn arwyddo dros y clwb tair blynedd yn ddiweddarach. Yn 1956 fe aeth Medwin i ogledd Llundain ac arwyddo i Tottenham Hotspur, a dwy flynedd yn ddiweddarach fe ddilynodd Cliff unwaith eto.
Sgoriodd Cliff Jones dair gôl dros Gymru yng Nghwpan y Byd 1958 yn Sweden
Yn ffrindiau oes, mi fydd y cyswllt rhwng y teuluoedd Jones a Medwin yn agos am flynyddoedd, yn enwedig tra'n pobi cacenni cri.
Hefyd o ddiddordeb: