Dau'n ddieuog o ddynladdiad yn sgil cwymp eglwys

Roedd Jeff Plevey yn 56 oed ac yn dad i ddau o blant

Mae dau ddyn wedi eu cael yn ddieuog o ddynladdiad trwy esgeulustod dybryd yn achos sgaffaldiwr a fu farw pan gwympodd wal eglwys yng Nghaerdydd.

Ond fe gafwyd Keith Young, o Landochau Fach, Bro Morgannwg a Stewart Swain, o ardal Yr Eglwys Newydd, Caerdydd yn euog o dorri rheolau iechyd a diogelwch.

Cafodd Jeff Plevey, oedd yn 56 oed ac o Gaerdydd, ei wasgu i farwolaeth yn ystod gwaith dymchwel Eglwys Citadel yn Sblot yng Ngorffennaf 2017.

Bydd y ddau ddiffynnydd yn cael eu dedfrydu yn y flwyddyn newydd, ynghyd â dau ddyn arall oedd wedi pledio'n euog i dorri rheolau iechyd a diogelwch.

Bu farw Mr Plevey pan ildiodd wal gefn yr eglwys wrth iddo weithio arno.

Roedd yr eglwys yn cael ei dymchwel pan fu farw Mr Plevey

Wedi achos a barodd am 11 wythnos, fe benderfynodd rheithgor yng Nghanolfan Ddinesig Abertawe - o fwyafrif - bod Swain a Young yn euog o fethu â gyflawni eu dyletswyddau dan y Ddeddf Iechyd a Diogelwch yn y Gwaith.

Swain yw cyfarwyddwr y cwmni sgaffaldiau Swain Scaffolding Ltd a Young yw cyfarwyddwr y cwmni dymchwel Young Contractors, oedd yn rhan o'r gwaith o ddymchwel yr eglwys.

Cafwyd dau ddyn arall, gan gynnwys perchennog yr eglwys, yn ddieuog o droseddau iechyd a diogelwch.

Roedd dau ddiffynnydd arall eisoes wedi cyfaddef torri rheolau iechyd a diogelwch - Phil Thomas o Gaerdydd, sef ymgynghorydd iechyd a diogelwch Young, a Richard Dean o Abertyleri, sy'n ymgynghorydd peirianneg.

'Gall Dad orffwys nawr'

Mewn datganiad yn dilyn y dyfarniadau, dywedodd plant Mr Plevey, Lauren a Joshua bod y cyfnod ers ei farwolaeth wedi bod "heriol i ni gyd", a'u bod yn ddiolchgar i bawb "a weithiodd yn ddiflino i gael atebion i'n teulu".

Ychwanegodd y datganiad: "Rydym mor falch ein bod o'r diwedd wedi dod i derfyn proses mor hirfaith. Gallwn dynnu llinell oddi tano, gall Dad orffwys nawr."