Yn ôl i'r dechreuad gyda Trystan ac Emma

Noswyl calan rhyddhaodd rhaglen BBC Radio Cymru, Trystan ac Emma, sengl gydag unrhyw elw yn mynd i elusen Plant Mewn Angen.

Mae'r ddau gyflwynydd poblogaidd wedi casglu criw arbennig o unigolion ynghŷd i ganu un o ganeuon Caryl Parry Jones, Yn Y Dechreuad, gan gynnwys Rhys Meirion a Caryl ei hun.

Mae rhaglen Trystan ac Emma ar Radio Cymru bob bore dydd Gwener rhwng 9 ac 11

Ond yr hyn sy'n gwneud y sengl hon yn unigryw yw cyfraniad ffrindiau'r rhaglen i'r gân.

Clywn leisiau rai o'r criw newyddion sy'n cystadlu'n frwdfrydig yng nghwis y rhaglen bob dydd Gwener; yn ymddangos hefyd mae'r cwisfeistr ei hun Ieuan Jones, neu iodel Ieu i wrandawyr triw y rhaglen; ac un sydd wastad yn barod am sgwrs ar y tonfeddi gyda'i hŵyr mae Nain Trystan, Margaret Willams (na, nid *y* Margaret Williams!), wedi cyfrannu i'r sengl hefyd ac mae hynny ond enwi rhai.

Holon ni Trystan ac Emma am yr hyn a sbardunodd y prosiect.

"Dw i'n meddwl nes i gael rhyw egin syniad, achos bod gyno ni gyfranwyr da i'r rhaglen, y bysa fo'n ffordd neis o gael undod ac uno pawb efo'i gilydd," meddai Trystan.

"Wnaethon ni chwarae Yn Y Dechreuad ar y rhaglen," dywedodd Emma, "a mi wnes di [Trystan] ddweud "honna ydy hi"."

"Mae hi mor feel-good dydy? Nid yn unig geiriau anhygoel ond mae'r gerddoriaeth yn dy godi di rhywsut hefyd dydy," ychwanegodd Trystan.

Dechreuodd rhaglen Trystan ac Emma yn ôl ym mis Tachwedd 2020

Teimla'r ddau ei bod hi'n gân addas ar gyfer y cyfnod rydyn ni wedi bod ynddo am y flwyddyn a hanner ddiwethaf.

Eglurodd Emma: "Mae pawb wedi sylweddoli bod bywyd yn well pan mae'n syml. Gadewch i ni gyd fynd yn ôl i'r dechreuad a dechrau eto. Felly dw i'n meddwl ei bod hi'n addas iawn, ac fel ti'n dweud, Trystan, fedrwch chi ddim help ond canu efo hi, symud efo hi a gwenu pan 'dach chi'n clywed y gân."

O ran cael gwrandawyr y rhaglen ynghlwm â'r sengl, mae'r ddau gyflwynydd yn barod iawn i roi'r gydnabyddiaeth am fwrlwm a phositifrwydd y gân iddyn nhw.

Dywedodd Trystan: "Y bobl sy'n 'neud o de? Y cyfranwyr i gyd. Fath â Nain de? Y rheswm bod Nain ynddo fo ydy ei bod hi wedi bod yn dipio mewn ac allan o'r rhaglen, dydy? 'Dan ni wedi bod yn cael catch-up efo Nain, yn enwedig yn y cyfnod clo, i weld sut oedd hi'n ymdopi. Felly oedden ni'n teimlo fedrwn ni ddim cael sengl heb gael Nain arni. Wedyn 'naeth Nain esblygu i fod yn Nain a Rhys Meirion."

Yn ôl Trystan, ei nain yw "number 1 fan" Rhys Meirion

Ac o hynny, mae wedi esblygu ymhellach i gynnwys deuddeg o gantorion unigol, plant Ysgol Gymraeg Y Fenni, a hyd yn oed ci!

Aeth rhai o'r cantorion draw i stiwdio'r cerddor Mei Gwynedd yng Nghaerdydd i recordio, tra aeth llond llaw i recordio yn Stiwdio Sain yn Llandwrog.

Dywedodd Mei, sydd wedi cynhyrchu'r sengl: "Erbyn hyn dwi wedi gweithio ar sawl cân torfol gydag artistiaid amrywiol, yn cynnwys Gŵyl Y Baban gan Caryl nôl yn 2011, ond mae hon wedi bod yn brofiad unigryw iawn! Roedd clywed y syniad o dynnu ffrindiau'r sioe, y plant ac wrth gwrs y cyflwynwyr i ganu ar y gân yn wahanol i'r arfer, a dwi wedi mwynhau pob eiliad o'r broses."

Caryl Parry Jones, cyfansoddwraig Yn Y Dechreuad a Mei Gwynedd fu'n cynhyrchu'r fersiwn newydd

"Yn aml fydda' i yn dweud nad yw un diwrnod 'run peth â'r llall, a dyna yn union yr oeddwn yn meddwl wrth gymysgu - ci yn canu ar drac! Blwyddyn newydd dda i chi gyd!"

Cyfle i adlewyrchu

Yn ddiweddar dathlodd y rhaglen flwyddyn gron ar yr awyr, ac fe gynigiodd hynny gyfle i'r tîm edrych yn ôl ar y môr o bobl sydd wedi rhoi eu hamser i siarad gyda Trystan ac Emma a rhannu eu straeon. Yn ôl Emma, mae'r sengl yn gyfle i roi'r teimlad yna ar gof a chadw.

"'Dan ni wedi cael blwyddyn o wneud y rhaglen a 'dan ni wedi cwrdd a sgwrsio efo pobl mor lyfli, mor agos atat ti, mor annwyl, mor ddoniol, mor ddifyr," meddai. "Mae'r ymdrech maen nhw wedi'i roi i'n rhaglen ni... heb y cyfranwyr fydde gennym ni ddim rhaglen. A dw i'n teimlo ar ôl clywed y gân a gwylio'r fideo mae o'n cwmpasu ein bwriad ni efo'r rhaglen."

Gallwch lawrlwytho fersiwn Rhaglen Trystan ac Emma o Yn Y Dechreuad yma.