Pont Britannia: Cyhoeddi mai dyn o ardal Amlwch fu farw

Dywed Heddlu'r Gogledd mai dyn 52 oed o ardal Amlwch fu farw yn dilyn gwrthdrawiad difrifol ar Bont Britannia yn oriau mân fore Iau.

Cafodd Heddlu'r Gogledd eu galw i'r digwyddiad - rhwng dwy lori a dau gar - ar yr A55 am 02:56.

Bu farw gyrrwr un o'r ceir, ac mae gyrrwr y car arall yn Ysbyty Gwynedd gydag anafiadau difrifol.

Mae gyrrwr un o'r lorïau, a gafodd ei arestio ar amheuaeth o achosi marwolaeth ac anafiadau difrifol drwy yrru'n beryglus, wedi cael ei rhyddhau dan ymchwiliad.

Mae'r heddlu wedi cau Pont Britannia wedi'r digwyddiad, ac mae ffyrdd yr ardal yn brysur fore Iau

Dywedodd Gwasanaeth Ambiwlans Cymru bod tri chriw wedi eu hanfon i'r digwyddiad.

Cafodd y criwiau gymorth ambiwlans awyr a cherbyd ymateb brys.

Apelio am wybodaeth

Dywed Heddlu'r Gogledd bod y ffordd i gyfeiriad y dwyrain wedi agor toc cyn 12:30 a bod un lon o'r ffordd i gyfeiriad y gorllewin wedi ailagor ychydig wedi 16:00.

Dywedodd y Sarjant Jason Diamond o Heddlu Gogledd Cymru: "Mae ein hymholiadau yn parhau ac rydym yn apelio ar unrhyw un a oedd yn teithio ar yr A55 toc cyn y gwrthdrawiad am 03:00 neu a allai fod â recordiad o gamera cerbyd i gysylltu â ni.

"Rwy'n ymwybodol o'r oedi sydd wedi bod ddydd Iau ac rwy'n diolch i yrwyr am eu hamynedd.

"Gydol y dydd ry'n wedi bod yn gweithio gyda phartneriaid i agor y ffordd cyn gynted â phosib."

Mae perthnasau agos y dyn fu farw wedi cael gwybod am ei farwolaeth ac maent yn cael cymorth gan swyddog arbenigol.