Rheithgor yn clywed recordiad o ymosodiad Parc Bute

Clywodd y rheithgor bod Dr Gary Jenkins wedi ymbil sawl tro i ymosodiad arno stopio

Mae Llys Y Goron Merthyr Tudful wedi clywed recordiad o ymosodiad ar seiciatrydd mewn parc yng Nghaerdydd a arweiniodd at ei farwolaeth yn yr ysbyty 16 o ddiwrnodau'n ddiweddarach.

Yn y recordiad, sy'n para am 15 o funudau, mae'n bosib clywed Dr Gary Jenkins yn ymbil sawl tro: "Gadewch lonydd i mi - stopiwch."

Cafodd y sain ei recordio ar gamera CCTV caffi ym Mharc Bute sydd ar bwys lleoliad yr ymosodiad a ddigwyddodd ar 20 Gorffennaf y llynedd, ond ni chafodd unrhyw luniau o'r digwyddiad eu casglu.

Mae Lee Strickland, 36, Jason Edwards, 25, a merch 17 oed na ellir ei henwi am resymau cyfreithiol yn gwadu llofruddio Dr Jenkins ond maen nhw wedi pleidio'n euog i ddynladdiad a lladrata.

Mae'r erlyniad yn honni bod Dr Jenkins wedi cael ei "arteithio a'i adael i farw" wedi ymosodiad "homoffobig".

Mae'n bosib ei glywed yn y recordiad yn erfyn am help, ynghyd â llais gwrywaidd yn gweiddi ar yr ymosodwyr: "Dowch oddi arno", "Be' 'dach chi'n neud?" a "Gadewch lonydd iddo", ond mae sŵn yr ymosodiad yn parhau.

Lee Strickland a Jason Edwards yn cyrraedd Llys y Goron Merthyr Tudful ar ddiwrnod cyntaf yr achos

Dywed yr erlyniad mai lleisiau Dr Jenkins a'r tri diffynnydd sydd i'w clywed yn bennaf yn y recordiad.

Mae'n bosib clywed lleisiau gwrywaidd yn gweiddi geiriau homoffobig ac yna sŵn Dr Jenkins yn griddfan ac yn apelio i'r ymosodiad ddod i ben.

Ar un pwynt, mae'n dweud: "Plîs, plîs na, plîs na, stopiwch, s'dim byd ar ôl, stopiwch, stopiwch, stopiwch."

Ar adeg arall, mae'r llais benywaidd yn mynnu arian ac mae llais gwrywaidd yn ateb: "Taro fe, taro fe eto". Mae hefyd yn bosib clywed disgrifiadau o weithredoedd treisgar eraill.

Ar ddiwedd y recordiad, mae'r llais benywaidd yn dweud: "Ie, ro'n i angen hynna."

Cafodd y recordiad sain ei gasglu gan gamera CCTV caffi ym Mharc Bute ger lleoliad yr ymosodiad

Mae'r rheithgor hefyd wedi gweld lluniau camera 'bodycam' swyddogion heddlu'n cyrraedd safle'r ymosodiad ac yn darganfod Dr Jenkins wedi ei anafu'n ddifrifol a'i drowsus wedi ei dynnu i lawr.

Mae lluniau CCTV hefyd yn dangos Lee Strickland yn prynu whisgi mewn gorsaf betrol ar Ffordd y Gadeirlan wyth munud wedi'r adeg y mae'r erlyniad yn honni y gellir ei glywed yn recordiad y caffi ym Mharc Bute.

Clywodd y llys bod y diffynnydd wedi defnyddio cardiau Dr Jenkins i brynu'r whisgi.

Mae'r rheithgor hefyd wedi gweld lluniau CCTV yn Ffordd y Gogledd, ben arall y parc, lle mae'r erlyniad yn honni y rhoddodd y ferch, oedd yn 16 oed ar y pryd, ffôn Dr Jenkins i Jason Edwards cyn i'r ddau gofleidio'i gilydd a gadael gan fynd i gyfeiriadau gwahanol.

Mae'r achos yn parhau.