'Da bod Cymro Cymraeg yng nghalon Llywodraeth y DU'

Mae penodiad Guto Harri (chwith) i'w groesawu, medd David TC Davies

Mae Gweinidog yn Swyddfa Cymru wedi croesawu'r ffaith bod "Cymro Cymraeg yng nghanol" Llywodraeth y DU yn dilyn penodiad Guto Harri fel cyfarwyddwr cyfathrebu newydd Boris Johnson.

Mewn cyfweliad ar raglen Bore Sul BBC Radio Cymru, dywedodd AS Mynwy, David TC Davies, bod y penodiad, a gafodd ei gadarnhau nos Sadwrn, yn "brilliant".

Dywedodd bod ganddo "ffydd 100%" y bydd y cyflwynydd a'r newyddiadurwr yn helpu adfer hyder yn y Blaid Geidwadol.

Awgrymodd hefyd bod cael Cymro Cymraeg yn Downing Street yn golygu "fyddwn ni'n mynd i gael rhywun sy'n deall pwysigrwydd [yr] iaith yn ein gwlad ni".

'Yn falch' o dderbyn y swydd

Wrth ymateb i'w benodiad ar Twitter yn ddiweddarach nos Sul, dywedodd Mr Harri ei fod "yn falch" o fod wedi derbyn y rôl.

Cyhoeddodd neges yn cynnwys llun ohono gyda'r actor Peter Capaldi, oedd yn portreadu'r cymeriad Malcom Tucker - cyfarwyddwr cyfathrebu i lywodraeth y dydd - yng nghyfres gomedi ddychanol y BBC, The Thick Of It.

Dywedodd: "Ar ôl dilyn cyngor gan ragflaenydd enwog [Malcom Tucker], rwy'n falch o gadarnhau fy mod wedi derbyn rôl Cyfarwyddwr Cyfathrebu Boris Johnson.

"Rwy'n ymuno â thîm aruthrol i ganolbwyntio ar y pethau sy'n bwysig a chyflawni'r hyn y mae [Boris Johnson] wedi'i addo i'r bobl."

Cadarnhaodd S4C nos Sadwrn na fydd Mr Harri'n parhau i gyflwyno'r rhaglen Y Byd Yn Ei Le ar y sianel yn sgil y penodiad.

Mewn ymateb i ymholiad ar Twitter fore Sul, dywedodd y sianel: "Roedd Guto yn gyflwynydd llawrydd. Ni fydd o bellach yn cyflwyno ar S4C tra yn y swydd bresennol."

Guto Harri gyda Boris Johnson yn 2009 pan roedd yn gyfarwyddwr cyfathrebu yn nhymor cyntaf y Prif Weinidog yn Faer Llundain

Roedd cyfarwyddwr cyfathrebu Mr Johnson, Jack Doyle, ymhlith pum aelod allweddol o'i dîm a ymddiswyddodd ddyddiau ar ôl cyhoeddiad adroddiad cychwynnol i bartïon yn 10 Downing Street tra bod cyfyngiadau Covid mewn grym.

Mae sawl AS Ceidwadol hefyd wedi cadarnhau eu bod wedi ysgrifennu llythyrau'n datgan diffyg hyder yn y Prif Weinidog.

Yn ôl Mr Johnson fe fydd y bydd penodiadau newydd "yn gwella'r ffordd y mae Rhif 10 yn gweithredu".

Newid diwylliant

Mae'n "rhaid derbyn", medd David TC Davies, bod "sefyllfa ble roedd pobl yn yfed alcohol yn ystod y dydd yn anghywir".

Dywedodd: "Fel mae'r wasg wedi pwyntio mas heddiw, mae Guto yn dweud y gwir at rym ac mae hynny'n bwysig iawn.

'Maen bwysig ymddangos fel petai'r diwylliant yn mynd i newid yn Downing Street. Yn fy marn i - mae hyn yn dipyn bach o stereotype - ond efallai mae gormod o bobl tipyn bach yn rhy ifanc sy'n gweithio yno."

Rhaid newid y diwylliant y tu ôl i ddrws 10 Downing Street, medd David TC Davies

Dywedodd mai "cwestiwn anodd" yw awgrymu cyngor i Mr Harri sut mae adfer ffydd yn y blaid wedi'r dadlau dros dorri rheolau Covid yn Downing Street.

Mae'r blaid, meddai, "yn fwy" na "grŵp bach o bobol gyda rhyw fath o lifestyle" penodol, ac "mae miloedd ohonon ni sy'n byw dydd i ddydd sy' wedi dilyn y rheolau drwy'r Covid pandemic sy'n disgwyl i'r rhai yn Stryd Downing g'neud hynny hefyd".

Pwysleisiodd yr angen i fynd i'r afael â materion "sy'n mynd i effeithio arnon ni am flynyddoedd i ddod, fel costau byw a'r hyn sy'n digwydd yn Iwcrain" gan ychwanegu "dwi'n siŵr bod Guto yn mynd i wneud hynny".