Cyngor yn cyhoeddi canlyniadau ffug mewn camgymeriad

Mae Cyngor Sir Penfro yn dweud taw dim ond canlyniadau ffug gafodd ei defnyddio

Mae Cyngor Sir Benfro wedi cyfaddef bod canlyniadau ffug ar gyfer etholiadau'r Cyngor Sir ar 5 Mai wedi eu cyhoeddi drwy gamgymeriad ar eu gwefan.

Dyw hi ddim yn glir am ba mor hir roedd modd gweld canlyniadau'r 59 ward, ond fe ddefnyddiwyd enwau ymgeiswyr a phleidiau go iawn fel rhan o'r hyn a ddisgrifiwyd fel tudalen brawf ar gyfer defnydd mewnol yn unig.

Mae'r Cyngor wedi cyfaddef bod modd darganfod y dudalen ar-lein am gyfnod, cyn iddyn nhw sylwi ar y camgymeriad.

Dyw hi ddim yn bosib gweld y canlyniadau erbyn hyn.

Mae Cyngor Sir Penfro wedi pwysleisio mai canlyniadau ffug yn unig a gyhoeddwyd ac fe fydd y canlyniadau yn cael eu cyhoeddi ar ddydd Gwener 6 Mai.