Glynebwy: 600 o swyddi newydd mewn ffatri poteli gwydr

Dyma sut mae disgwyl i'r ffatri newydd gwerth £390m i edrych unwaith y bydd wedi'i adeiladu ar gyrion Glynebwy

Mae cynlluniau ar gyfer ffatri cynhyrchu gwydr gwerth £390 miliwn wedi'u cymeradwyo gan Gyngor Blaenau Gwent.

Mae disgwyl y bydd datblygiad cwmni CiNER Glass Ltd - sydd o Dwrci - yn creu dros 600 o swyddi parhaol.

Fe ddisgrifiwyd penderfyniad y Pwyllgor Cynllunio i gymeradwyo'r cynllun ddydd Iau fel "diwrnod gwych i Flaenau Gwent".

Bydd yn cael ei ddatblygu ar Stad Ddiwydiannol Rassau ar gyrion Glynebwy.

Swyddi ychwanegol

Mae disgwyl i'r prosiect greu tua 600 o swyddi parhaol - gan gynnwys gwyddonwyr a gwaith ymchwil a datblygu - ac hyd at 500 arall yn ystod y cyfnod adeiladu.

Ond, clywodd cynghorwyr gall y ffatri gefnogi 1,200 o swyddi ychwanegol fel rhan o'r gadwyn gyflenwi.

Bydd y broses yn cynnwys mewnforio tywod er mwyn creu gwydr newydd ac ailgylchu gwydr sydd eisoes wedi'i ddefnyddio.

Wedi'r cyfarfod dywedodd aelod o fwrdd gweithredol CiNER Glass Ltd, Didem Ciner eu bod yn "hynod o falch".

"Dyma'r cam cyntaf tuag at adeiladu cyfleuster o safon fyd-eang yng nghanol de Cymru ac ni allwn aros i ddechrau gwireddu ein gweledigaeth ar gyfer Blaenau Gwent."

Y gobaith yw y bydd y ffatri'n weithredol erbyn 2026.