Trecynon: Dyn 75 oed wedi marw ar ôl i'w gar daro polyn lamp

Roedd Heol y Fynwent, Trecynon ar gau am oriau wedi'r digwyddiad ddydd Llun, 25 Gorffennaf

Mae dyn 75 oed wedi marw ar ôl i'w gar daro yn erbyn polyn lamp yn ardal Aberdâr, Rhondda Cynon Taf.

Dywed Heddlu De Cymru fod car Ford Kuga gwyn y dyn wedi dod oddi ar Heol y Fynwent, Trecynon wrth iddo yrru am tua 14:45 ddydd Llun.

Fe darodd y car yn erbyn polyn lamp a bu farw'r dyn - a oedd yn lleol i'r ardal - o'i anafiadau.

Mae teulu'r dyn yn cael eu cefnogi gan swyddogion arbenigol ac mae'r heddlu yn apelio am dystion.