Cerddwr wedi marw yn dilyn gwrthdrawiad yn Nowlais

Fe ddigwyddodd y gwrthdrawiad ar Stryd Fawr, Dowlais

Mae menyw 52 oed wedi marw yn dilyn gwrthdrawiad ffordd yn Sir Merthyr Tudful.

Fe ddigwyddodd y gwrthdrawiad, oedd yn cynnwys car MG ZS llwyd a cherddwr, ar y Stryd Fawr yn Nowlais tua 17:50 brynhawn Llun, 19 Medi.

Er gwaethaf ymdrechion y gwasanaethau brys ac aelodau'r cyhoedd, bu farw'r fenyw, oedd yn dod o Bentre-bach, yn y fan a'r lle.

Dywed Heddlu De Cymru bod dyn 29 oed wedi cael ei arestio ar amheuaeth o achosi marwolaeth trwy yrru'n beryglus, ac mae'n parhau yn y ddalfa.

"Hoffwn ni ddiolch i'r aelodau hynny o'r cyhoedd a roddodd cymorth i ni," meddai'r Cwnstabl Emma Thomas.

"Hoffwn ni glywed gan unrhyw un allai fod wedi bod yn dyst i'r gwrthdrawiad neu all fod â lluniau dash-cam o'r digwyddiad neu a welodd sut y cafodd yr MG ei yrru cyn y gwrthdrawiad."