Ysgrifennydd Cymru o blaid gwyliau Dydd Gŵyl Dewi

Robert BucklandPA Media

Mae Syr Robert Buckland yn argymell rhoi'r gorau i ŵyl y banc arall er mwyn gwneud lle i ddathliad ar 1 Mawrth

Mae Ysgrifennydd Gwladol Cymru wedi datgan ei gefnogaeth i ddynodi Dydd Gŵyl Dewi fel gŵyl y banc yng Nghymru.

Y llynedd fe wnaeth Llywodraeth y DU wrthod galwadau i'w wneud yn wyliau cyhoeddus, er bod y syniad wedi ei gefnogi gan Senedd Cymru.

Mae'r Alban a Gogledd Iwerddon eisoes yn dathlu diwrnodau o wyliau ar ddyddiau eu nawddseintiau, ond dydy pwerau tebyg dros ddynodi gwyliau banc ddim wedi'u datganoli yn yr un modd i Fae Caerdydd.

Mewn ymateb i Gyngor Gwynedd - oedd wedi anfon llythyr at weinidogion yn galw am ddynodi 1 Mawrth fel gŵyl y banc - dywedwyd byddai gwyliau ychwanegol yng Nghymru yn arwain at gostau ac anghyfleustra economaidd sylweddol.

Ond mewn cyfweliad gyda rhaglen Y Byd yn ei Le ar S4C, mae Syr Robert Buckland wedi awgrymu y dylid rhoi'r gorau i ŵyl banc arall er mwyn gwneud lle ar gyfer dathliad ar 1 Mawrth.

'Rhaid bod yn ofalus'

Mae Calan Mai, sydd hefyd yn cael ei adnabod fel Diwrnod Rhyngwladol y Gweithwyr, wedi bod yn ŵyl banc yn y DU ers 1978.

Ond argymhelliad personol Ysgrifennydd Cymru yw y gall gweithwyr yng Nghymru dderbyn diwrnod o wyliau ar 1 Mawrth yn lle hynny.

Mae rhai yn dweud byddai Gŵyl y Banc ar 1 Mawrth yn hybu rhannau o'r economi

"Dwi wastad wedi bod yn cydymdeimlo'n fawr â hynny," dywedodd Mr Buckland, a gafodd ei benodi gan Boris Johnson ac sydd wedi cadw ei le yng nghabinet newydd Liz Truss.

"Ond dwi'n meddwl bod rhaid bod yn ofalus am ormod o wyliau banc.

"Fy marn bersonol i byddai cael gwared ar Calan Mai a chael Dydd Gŵyl Dewi fel gŵyl y banc a byddai'n quid pro quo neis."

'Amharu ar fusnes'

Y llynedd wnaeth cyn-weinidog busnes Llywodraeth y DU, Paul Scully, wrthod cais i wneud 1 Mawrth yn wyliau cyhoeddus yng Nghymru.

Sbardunwyd y galwadau gan gynghorwyr yng Ngwynedd, oedd wedi anfon llythyr i weinidogion yn galw i ddatganoli'r hawl i Fae Caerdydd.

Mae'r Aelod Senedd Ceidwadol, Tom Giffard, hefyd yn cefnogi galwadau cynyddol am ŵyl banc ar 1 Mawrth

Dywedodd Mr Scully ar y pryd ei fod yn cydnabod awydd y Cymry i "ddathlu eu nawddsant", ond y byddai nifer y bobl sy'n gweithio ar hyd y ffin rhwng Cymru a Lloegr yn "arwain at amharu mwy ar fusnes".

Nid Syr Robert Buckland yw'r Ceidwadwr cyntaf i alw ar y Llywodraeth i newid eu meddwl.

Mae'r Ceidwadwyr Cymreig yn y Senedd hefyd yn credu y gallai fod yn "hwb diwylliannol".

"Mae'n dathlu'r ffaith bod ni'n Gymreig a beth sy'n 'neud ni'n Gymreig," meddai Tom Giffard AS yn gynharach eleni.

"Mae'n bwysig bod ni'n cael diwrnod i ddathlu hwnna fel maen nhw'n 'neud yn Iwerddon a'r Alban."

Mae Llywodraeth y DU wedi derbyn cais i ymateb.

Pynciau cysylltiedig

Straeon perthnasol