Dyn yn ddifrifol wael wedi gwrthdrawiad ger Casnewydd

Fe ddigwyddodd y gwrthdrawiad ar yr A4042 rhwng Cwmbrân a Chasnewydd nos Wener

Mae dyn, 33, yn ddifrifol wael yn yr ysbyty yn dilyn gwrthdrawiad rhwng Cwmbrân a Chasnewydd.

Cafodd yr heddlu eu galw i ffordd yr A4042 yn dilyn y gwrthdrawiad rhwng car BMW M3 oren a beic modur am tua 18:20 nos Wener.

Roedd y car wedi gadael y digwyddiad cyn i'r gwasanaethau brys gyrraedd, yn ôl yr heddlu.

Mae dyn 50 oed o Gwmbrân a dyn 40 oed o Gasnewydd wedi eu harestio ar amheuaeth o achosi niwed difrifol trwy yrru yn beryglus ac o fethu stopio yn dilyn y gwrthdrawiad.

Mae'r ddau wedi eu rhyddhau tra bod ymchwiliad yr heddlu yn parhau.

Mae Heddlu Gwent yn awyddus i glywed gan unrhyw un welodd y BMW oren a char BMW llwyd yn y munudau cyn y digwyddiad.