Cymru yn ymuno â'r mawrion yng Nghwpan Hoci'r Byd

Gorffennodd Cymru'n chweched yng Ngemau'r Gymanwlad yr haf diwethaf

Mae tîm dynion hoci Cymru wedi creu hanes drwy gystadlu yng Nghwpan y Byd am y tro cyntaf.

Mae camp Cymru hyd yn oed yn fwy nodedig o ystyried bod y garfan yn un rhan-amser, a'u bod wedi gorfod talu rhan o'r gost eu hunain er mwyn cyrraedd y gystadleuaeth .

Mae'r garfan yn gobeithio "ysbrydoli cenhedlaeth newydd o chwaraewyr" wrth wynebu rhai o dimau gorau'r byd yn India.

Ar y maes, colli oedd hanes y tîm yn y gêm agoriadol ddydd Gwener, a hynny o 5-0 yn erbyn Lloegr, sy'n bumed yn y rhestr detholion.

Dros yr wythnos nesaf bydd tîm Cymru yn wynebu Sbaen ac India - sydd hefyd ymysg y cryfaf sy'n cystadlu yn y gamp.

Luke Hawker (chwith) yn dathlu ar ôl rhwydo'n erbyn Canada y llynedd

Yn siarad cyn y gystadleuaeth, dywedodd y cyd-gapten, Luke Hawker, bod y sialens o gystadlu gyda'r mawrion yn un roedden nhw'n edrych ymlaen ati.

"Mae'n fwy nag unrhyw beth yr ydym erioed wedi'i brofi - i unrhyw un yn y garfan, gan gynnwys y staff," meddai.

"Mae hoci yn hobi i'r mwyafrif ohonom ni - dyna rydyn ni'n ei wneud yn ein hamser hamdden, gyda'r nos ac ar benwythnosau.

"I fod yn mynd i Gwpan y Byd a chwarae a pherfformio ar y llwyfan hwnnw, mae'n foment pinsio'ch hun a dweud y gwir."

'Cymru ar lefel fyd-eang'

Llai na degawd yn ôl roedd Cymru'n cystadlu yn nhrydedd haen Hoci Ewrop.

O ganlyniad, dywedodd aelod arall o'r garfan bod cyrraedd India ynddo'i hun yn "dipyn o gamp".

Mae Rupert Shipperley eisoes wedi cystadlu yn y Gemau Olympaidd

"Roedd [chwarae i'r DU yn y Gemau Olympaidd yn] Tokyo yn enfawr ond mae Cwpan y Byd gyda Chymru, gyda'r grŵp yma o chwaraewyr rydyn ni wedi'i gael am y saith i wyth mlynedd ddiwethaf, yn rhywbeth arbennig iawn," meddai Rupert Shipperley.

"Mae'n rhoi Hoci Cymru ar lefel fyd-eang ac yn rhoi gwybod iddyn nhw ein bod ni yma i aros."

'Gyda'i gilydd ers amser maith'

Cymhwysodd Cymru ar gyfer India 2023 yn dilyn buddugoliaeth dros Iwerddon yng Nghaerdydd yn Hydref 2021.

"Roedd yn gyfnod digon tywyll i ni," dywedodd y prif hyfforddwr Danny Newcombe.

"Ond fe roddodd gyfle i ni ailosod y grŵp ac ailosod yr hyn roedden ni'n ei wneud - ac yna mynd ar yr antur a'r siwrnai anhygoel hon gyda'r grŵp anhygoel yma.

"Mae gennym ni grŵp da o chwaraewyr - grŵp da o bobl. Rydyn ni wedi glynu gyda'n gilydd ac wedi gwella.

"Felly mae'r cryfder yn y dysgu ar y cyd y mae'r grŵp wedi'i wneud dros chwech neu saith mlynedd.

"Mae craidd y grŵp wedi bod gyda'i gilydd ers amser maith bellach."

Gemau Cymru

Dydd Gwener, 13 Ionawr: Lloegr 5-0 Cymru

Dydd Sul, 15 Ionawr: Sbaen v Cymru

Dydd Iau, 19 Ionawr: India v Cymru