Dynes, 83, wedi marw ar ôl ymosodiad 'treisgar' gan gi

Mae ymchwiliad yr heddlu i'r digwyddiad yn Heol Fawr, Caerffili yn parhau

Clywodd agoriad cwest fod dynes 83 oed wedi marw o sepsis a briwiau oedd wedi eu heintio, ar ôl i gi ymosod arni yn ei chartref yng Nghaerffili.

Cafodd y cwest llawn i farwolaeth Shirley Patrick ei ohirio tan fis Hydref wrth i ymchwiliadau'r heddlu i amgylchiadau'r farwolaeth barhau.

Dywedodd Uwch Grwner Gwent, Caroline Saunders, fod yr heddlu wedi dod o hyd i Shirley Patrick, cyn-nyrs oedd wedi ymddeol, gydag anafiadau difrifol ar 3 Rhagfyr.

Dywedodd Ms Saunders fod Ms Patrick wedi ffonio'r heddlu yn gofyn am gymorth.

Arestio pedwar

"Dywedodd yr heddlu fod ci wedi ymosod arni a bod ganddi anafiadau sylweddol i'w hwyneb a'i breichiau," meddai'r crwner.

Fe gafodd y bensiynwraig ei chludo i Ysbyty Athrofaol Cymru yng Nghaerdydd ond bu farw ar 20 Rhagfyr.

Dywed adroddiad cychwynnol mai achos y farwolaeth oedd sepsis oedd wedi ei achosi gan friwiau oedd wedi eu heintio o ganlyniad i ymosodiad gan gi, a niwmonia.

Penderfynodd y crwner fod angen ymchwiliad pellach i'r farwolaeth, oedd yn un "treisgar ac annaturiol".

Yn dilyn yr ymosodiad mewn tŷ yn Heol Fawr, cafodd pedwar o bobl eu harestio ar amheuaeth o fod yn gyfrifol am gi oedd yn beryglus ac allan o reolaeth.

Cafodd y pedwar eu rhyddhau ar fechnïaeth amodol.