Arestio pedwar yn dilyn gwrthdrawiad yn Llandudno
- Cyhoeddwyd
Mae cerddwr 48 oed mewn cyflwr difrifol yn yr ysbyty yn dilyn gwrthdrawiad yn ardal Llanrhos y dref
Mae dyn 48 oed yn yr ysbyty gydag anafiadau "sy'n peryglu bywyd" yn dilyn gwrthdrawiad yn Llandudno nos Sadwrn.
Dywed Heddlu Gogledd Cymru bod yna wrthdrawiad rhwng cerddwr a cherbyd VW Polo du ar Lôn Crogfryn yn ardal Llanrhos y dref tua 23:30.
Yn ôl y llu roedd y cerbyd wedi gadael y safle cyn i'w swyddogion gyrraedd, a bu "VW Polo du hefyd mewn gwrthdrawiad tu allan i Lys Ynadon Llandudno ar Ffordd Conwy" tua 23:40.
Ychwanegodd: "Mae pedwar o bobl wedi cael eu harestio yn dilyn y digwyddiad."
Mae'r llu'n apelio am wybodaeth a lluniau gan unrhyw un oedd yn Lôn Crogfryn neu Ffordd Conwy tua adeg y ddau wrthdrawiad.