Merch bump oed wedi marw ar ôl tân mewn tŷ yn Sir Benfro
- Cyhoeddwyd
Bu farw Alysia, 5, yn y tân nos Sadwrn
Mae merch bump oed wedi marw ar ôl tân mewn tŷ ger Crymych yn Sir Benfro.
Fe gafodd y gwasanaethau brys eu galw i dŷ yn ardal Pontyglasier ychydig cyn 22:00 nos Sadwrn.
Dywedodd Heddlu Dyfed-Powys fod Alysia Salisbury wedi marw yn y fan a'r lle.
Mae teulu Alysia wedi ei disgrifio fel "merch a chwaer hardd".
Maen nhw'n cael eu cefnogi gan swyddogion arbenigol.
'Trasig'
Roedd swyddogion y gwasanaeth tân, y gwasanaeth ambiwlans a'r ambiwlans awyr yn bresennol, ynghyd â'r llu.
Fe gafodd y gwasanaethau brys eu galw i dŷ yn ardal Crymych, Sir Benfro ychydig cyn 22:00 nos Sadwrn
Dywedodd y Ditectif Arolygydd Llŷr Williams: "Mae ein meddyliau gyda'r teulu a'r gymuned leol ar yr adeg drasig yma.
"Mae'r crwner wedi cael gwybod a bydd swyddogion nawr yn gweithio gyda chydweithwyr o'r gwasanaeth tân i sefydlu achos y tân."
Mae dau gynghorydd lleol wedi galw am roddion i helpu "teulu ifanc sydd wedi colli popeth".
Mewn neges ar y cyfryngau cymdeithasol, dywedodd y cynghorwyr John Davies a Shon Rees eu bod yn trefnu casgliad o ddillad a bwyd ar eu cyfer.
"Mae ein meddyliau gyda'r teulu ar yr adeg anodd hon," dywedon.
"Ry'n ni eisiau canmol y gwasanaethau brys dan arweiniad Criw Tân Crymych am eu hymateb prydlon a phroffesiynol i'r digwyddiad."