Athletwr wedi marw yn ystod Triathlon Abertawe fore Sul
- Cyhoeddwyd
Mae'r triathlon yn ddigwyddiad poblogaidd (llun o ddigwyddiad blaenorol)
Mae dyn 61 oed wedi marw wrth nofio yn ystod Triathlon Abertawe.
Cadarnhaodd Activity Wales Events y farwolaeth gyda "chalon drom", gan anfon eu cydymdeimlwyd i deulu'r athletwr.
Mewn datganiad brynhawn Llun dywedodd Heddlu'r De: "Gallwn gadarnhau bod dyn 61 oed oedd yn cymryd rhan yn Nhriathlon Abertawe ddoe [dydd Sul] wedi marw.
"Mae ein meddyliau gyda theulu a ffrindiau'r dyn."
Roedd Heddlu De Cymru, Gwasanaeth Ambiwlans Cymru, Ambiwlans Sant Ioan, a gwirfoddolwyr ymhlith y rhai a geisiodd helpu ddydd Sul.
Digwyddiad undydd yw Triathlon Abertawe Prifysgol Cymru Y Drindod Dewi Sant.
Mewn neges ar Facebook, dolen allanol, fe ddiolchodd y trefnwyr i'r rhai a geisiodd rhoi cymorth am eu "hymdrechion anhygoel".
Dywedodd Gwasanaeth Ambiwlans Cymru eu bod wedi eu galw tua 09:15 fore Sul i argyfwng meddygol.
"Fe wnaethon ni anfon cerbyd ymateb cyflym, ambiwlans brys, a'r gwasanaeth adfer a throsglwyddo meddygol brys.
"Cawsom ein cefnogi hefyd gan Ambiwlans Sant Ioan."