Guto Harri: 'Boris Johnson wedi ei dwyllo gan y broses'

Recordiwyd rhaglen Question Time yng Nglannau Dyfrdwy nos Iau

Mae Ysgrifennydd Cymru, David TC Davies wedi gwrthod honiadau gan Boris Johnson fod yr ymchwiliad a ganfu iddo gamarwain San Steffan yn fwriadol yn "lys cangarŵ".

Cafodd y cyn-Brif Weinidog ei gondemnio mewn adroddiad gan y Pwyllgor Breintiau am gamarwain y Senedd dros dorri rheolau Covid.

Dywedodd Mr Johnson fod y canfyddiadau'n "deranged", ond dywedodd Mr Davies, AS Mynwy, fod y pwyllgor wedi "gwneud y peth iawn".

Dywedodd Guto Harri, cyn-gynorthwyydd i Mr Johnson, nad oedd yr adroddiad "yn edrych fel proses briodol".

Fe wnaeth y cyn-Brif Weinidog Boris Johnson gamarwain Tŷ'r Cyffredin yn fwriadol am gyfnodau clo yn Rhif 10, yn ôl adroddiad gan ASau

Wrth siarad ar raglen Question Time y BBC dywedodd David TC Davies wrth y gynulleidfa yng Nglannau Dyfrdwy fod ymchwiliad y Pwyllgor Breintiau wedi'i sefydlu gan Boris Johnson, a "dylen ni barchu eu canfyddiadau".

"Mae gen i bob ffydd fod y pwyllgor yn gwneud y peth iawn," meddai, gan ychwanegu: "Rydw i eisiau gwneud yn glir iawn fy mod i'n parchu'r gwaith mae'r pwyllgor wedi'i wneud."

Wrth sôn am honiadau Mr Johnson a'i gefnogwyr mai "llys cangarŵ" oedd y broses, dywedodd AS Ceidwadol Mynwy: "Mae hynny'n sicr yn rhywbeth na fyddwn i'n ei gefnogi o gwbl."

"Mae aelodau'r pwyllgor yn aelodau seneddol hirsefydlog, yn brofiadol iawn. Fe aethon nhw i mewn i hyn yn fanwl iawn."

'Nid yw'n edrych fel proses briodol'

Fodd bynnag, nid oedd Guto Harri yn credu fod y cyn-brif weinidog wedi cael ei drin yn deg.

"Rwy'n deall pam fod Boris yn teimlo ei fod wedi'i dwyllo ychydig gan y broses," medd Guto Harri

Dywedodd Mr Harri: "Os gallwch chi amddifadu pobl o'u bywoliaeth mae angen i chi fod y tu hwnt i waradwydd a'r syniad y gall cyn-arweinydd y blaid Lafur [Harriet Harman] benderfynu yn y bôn ar y broses a'r canlyniad sy'n gyrru prif weinidog Ceidwadol allan o'r Senedd.

"I mi, p'un a ydych yn hoffi Boris ai peidio, nid yw'n edrych fel proses briodol.

"Rwy'n deall pam fod Boris yn teimlo ei fod wedi'i dwyllo ychydig gan y broses."

Ond dywedodd y cyn-weinidog cabinet Llafur, yr Arglwydd David Blunkett, wrth y gynulleidfa: "Os ydych chi'n dweud celwydd wrth y Senedd, mae'n rhaid i chi fynd.

"Mae ganddo'r wyneb i feio'r pwyllgor, y Senedd, hyd yn oed ei gydweithwyr Ceidwadol. Dim ond un person sydd ganddo i'w feio - Boris Johnson yw hwnnw."

Bydd Aelodau Seneddol yn cael y cyfle i gymeradwyo neu wrthod argymhellion y pwyllgor ddydd Llun.