Bachgen 15 oed wedi marw ar ôl mynd i drafferthion yn Aberafan

Mae teyrngedau i David Ejimofor wedi dechrau ymddangos ger y traeth

Mae Heddlu'r De wedi cyhoeddi enw bachgen 15 oed fu farw ar ôl mynd i drafferthion ger traeth yng Nghastell-nedd Port Talbot.

Dywedodd y llu fod David Ejimofor yn dod o Aberafan, lle'r aeth i drafferthion nos Lun.

Fe gafodd swyddogion eu galw toc cyn 19:10 wedi adroddiadau fod bachgen yn y dŵr ger y traeth yno.

Roedd Gwylwyr y Glannau wedi cael eu galw i'r digwyddiad tuag awr ynghynt, gyda bad achub yr RNLI a hofrennydd yr ambiwlans awyr yn rhan o'r ymgyrch i'w achub.

Cafodd ei gludo i Ysbyty Tywysoges Cymru, yn ôl y gwasanaeth ambiwlans.

Er gwaethaf ymdrechion, dywedodd Heddlu'r De nad oedd modd ei achub.

Mae'r heddlu wedi apelio ar unrhyw un sydd â gwybodaeth ynghylch y digwyddiad i gysylltu â nhw

Mewn neges ar eu cyfrif Facebook dywedodd Ysgol Gatholig St Joseph ym Mhort Talbot eu bod "wedi tristau gan y newyddion trasig ac annisgwyl fod un o'n disgyblion Blwyddyn 11 wedi marw.

Dywedodd y pennaeth Eugene Scourfield fod "ein capel ar agor i ddisgyblion, rhieni a ffrindiau cymuned yr ysgol".

Mae'r heddlu wedi apelio ar unrhyw un sydd â gwybodaeth ynghylch y digwyddiad i gysylltu â nhw.

Dywedodd y Ditectif Arolygydd Carl Price: "Ry'n ni'n parhau i gyfweld â llygad dystion a chasglu tystiolaeth er mwyn sefydlu'r amgylchiadau wnaeth arwain at y digwyddiad trasig hwn.

"Ry'n ni'n gweithio gyda phartneriaid i gefnogi'r rheiny sydd wedi eu heffeithio ac mae'n meddyliau gyda ffrindiau a theulu David."