Diffyg Cymraeg ar gyfryngau cymdeithasol yn 'bryder'
- Cyhoeddwyd
![Efa Gruffudd Jones](https://ichef.bbci.co.uk/ace/standard/976/cpsprodpb/145D/production/_128331250_lluncywirefa2022.jpg)
Dywedodd Efa Gruffudd Jones bod angen edrych ar "sut allwn hwyluso" y defnydd o'r Gymraeg ar gyfryngau cymdeithasol
Mae'n "fater o bryder" bod cymaint o Saesneg yn cael ei ddefnyddio gan siaradwyr Cymraeg ifanc ar gyfryngau cymdeithasol, medd Comisiynydd y Gymraeg.
Wrth roi tystiolaeth i Bwyllgor Materion Cymreig San Steffan fore Mercher, dywedodd Efa Gruffudd Jones bod angen mwy o ymchwil ar y pwnc er mwyn gwybod "sut allwn hwyluso" mwy o ddefnydd o'r Gymraeg.
Dywedodd bod ei swyddfa yn cydweithio gyda'r Ganolfan Dysgu Cymraeg Genedlaethol er mwyn casglu gwybodaeth am eirfa pobl ifanc trwy gyfrwng y Gymraeg.
"Mae shorthand speech yn Saesneg. Beth yw'r cyfateb i LOL yn Gymraeg? Felly mae angen i hynny gael ei ystyried a'i ddatblygu ac mae'r gwaith yn mynd rhagddo," dywedodd.
![Graff defnydd iaith](https://ichef.bbci.co.uk/ace/standard/976/cpsprodpb/11096/production/_130228796_capture.jpg)
Mae tua 50% o siaradwyr Cymraeg ifanc yn dewis defnyddio cyfryngau cymdeithasol yn unig neu bennaf drwy gyfrwng y Saesneg
Cyfeiriodd at Arolwg Defnydd Iaith Llywodraeth Cymru, dolen allanol o fis Mawrth 2020, a ddangosodd bod 50% o siaradwyr Cymraeg ifanc yn dewis ymwneud yn unig neu'n bennaf drwy gyfrwng y Saesneg ar gyfryngau cymdeithasol.
Dywedodd y comisiynydd wrth y pwyllgor hefyd bod "y ffaith bod cymaint o gyfryngau gwahanol nawr yn ei gwneud yn anoddach i sicrhau bod y Gymraeg ar gael ar bob un o'r platfformau hynny".
Ychwanegodd y "byddai'n gymorth wrth lunio polisi cyhoeddus" pe byddai cwmnïau fel Facebook, Netflix a TikTok yn casglu data am y defnydd o Gymraeg ar eu platfformau.
Pynciau cysylltiedig
Straeon perthnasol
- Cyhoeddwyd31 Rhagfyr 2022
- Cyhoeddwyd27 Mehefin 2023
- Cyhoeddwyd21 Mehefin 2023