Sir Gâr: Cyn-athro wedi marw 'ar ôl ffrae annibyniaeth'

Bu farw cyn-athro ar ôl cael ei wthio yn y stryd yn dilyn ffrae dros annibyniaeth i Gymru, mae llys wedi clywed.

Roedd Peter Ormerod, 75, wedi ffraeo mewn tafarn yn Sir Gâr gyda Hywel Williams, 40, ynghylch a ddylai Cymru fod yn wlad ar wahân i'r DU.

Clywodd Llys y Goron Abertawe nad oedd y dynion yn cytuno ar y pwnc, a'u bod wedi trafod y mater mewn tafarn ym Mhorth Tywyn cyn digwyddiad rhwng y ddau y tu allan.

Mae Hywel Williams o Gaerdydd yn gwadu cyhuddiad o ddynladdiad.

'Rhywfaint o anghytuno'

Bu farw Mr Ormerod, cyn-athro yn Ysgol Gymraeg Bro Myrddin ac Ysgol Ramadeg Caerfyrddin, yn dilyn digwyddiad ym Medi 2022.

Clywodd y llys ei fod yn nhafarn y Portobello ym Mhorth Tywyn ar y noson dan sylw, ar wahân i Mr Williams, ond bod sgwrs wedi troi at annibyniaeth a gwleidyddiaeth yn gyffredinol.

Dywedodd yr erlynydd Ian Wright KC bod "rhywfaint o anghytuno" rhwng y ddau ddyn.

Aeth y ddau allan o'r dafarn yn fuan ar ôl ei gilydd, ac fe glywodd y llys bod lluniau CCTV o'r ddau gyda'i gilydd ger siop goffi.

Dywedodd Mr Wright bod Mr Ormerod wedi mynd at Mr Williams gan bwyntio tuag ato.

Clywodd y llys bod y ddau ddyn yn nhafarn y Portobello ym Mhorth Tywyn

"Yn dilyn hynny, mae'r ddau ddyn yn ymddangos ar y CCTV yn symud at ei gilydd cyn i Hywel Williams wthio Peter Ormerod yn ei frest", meddai.

"Fe wnaeth y gwthiad achosi i Peter Ormerod ddisgyn yn ôl a tharo cefn ei ben.

"Ar ôl taro ei ben ar y llawr, ni wnaeth Peter Ormerod symud eto."

Gwadu dynladdiad

Clywodd y llys bod Mr Williams wedi galw ambiwlans ac aros ar y safle nes i'r heddlu ei arestio.

Clywodd y llys hefyd bod Mr Williams wedi rhegi ar Mr Ormerod yn yr eiliadau ar ôl y digwyddiad.

Bu farw Mr Ormerod bedwar diwrnod yn ddiweddarach yn yr ysbyty ar ôl cael anafiadau difrifol i'w ben.

Clywodd y llys bod Mr Williams wedi honni mai amddiffyn ei hun a wnaeth y noson honno.

Dywedodd wrth yr heddlu bod Mr Ormerod "wedi dod tuag atai", a'i fod wedi "ei wthio i ffwrdd".

Mae Mr Williams yn gwadu cyhuddiad o ddynladdiad ac mae'r achos yn parhau.