Cwmni gemau cyfrifiadur i agor pencadlys yng Nghymru

Mae Rocket Science Corporation wedi gweithio gyda chyhoeddwyr rhai o gemau mwyaf y byd - gan gynnwys Fortnite

Bydd cwmni o'r Unol Daleithiau sy'n arbenigo ar gemau cyfrifiadur yn agor ei bencadlys Ewropeaidd yng Nghymru.

A hwythau wedi gweithio gyda chwmnïau EA a Marvel, Rocket Science Corporation sy'n creu rhai o gemau cyfrifiadurol mwyaf poblogaidd y byd.

Mae disgwyl i'r farchnad gemau cyfrifiadurol fyd-eang fod werth dros £200bn erbyn 2025.

Fe gyfrannodd Llywodraeth Cymru at gost symud y pencadlys yn y gobaith o dyfu'r diwydiant yng Nghymru.

Ffordd o aros yng Nghymru?

Yng Nghaerdydd fydd Rocket Science yn agor ei swyddfeydd - ei drydedd gangen ar ôl Efrog Newydd ac Austin, Texas - gyda de Cymru'n gwasanaethu cwsmeriaid ar draws Ewrop.

Mae'r cwmni wedi gweithio gyda chyhoeddwyr rhai o gemau mwyaf y byd gan gynnwys Fortnite, League of Legends a Battlefield.

• 'Dros 2 biliwn o bobl wedi chwarae fy ngemau'

• Technoleg gemau cyfrifiadur i hyfforddi radiolegwyr

Yn frodor o Ben-y-bont, dywedodd cyd-sylfaenydd Rocket Science Thomas Daniel, 38, bod y cwmni'n "dod mewn i weithio ar gemau mwya'r byd ac ry'n ni'n dod â phrofiad ein tîm Americanaidd i Gaerdydd".

"Mae'n mynd i greu sgiliau a phrofiad nad ydw i'n siŵr bod Cymru wedi ei brofi cyn hyn," meddai.

"Ro'n i fel pob plentyn arall yn tyfu lan yng Nghymru ac yn chwarae ar fy Amiga neu Super Nintendo, ond do'n i ddim yn adnabod unrhyw un oedd yn gweithio ym maes gemau cyfrifiadur yng Nghymru.

Mae Thomas Daniel eisiau gwneud hi'n bosib i osgoi gorfod gadael Cymru i lwyddo yn y diwydiant

"Roedd chwarae i Manchester United yn fwy cyraeddadwy na chael llwyddiant yn y diwydiant gemau.

"Roedd rhaid i fi symud i dde-ddwyrain Lloegr achos ar y pryd dyna lle'r oedd y mwyaf o swyddi - ac yna 'mlaen i America.

"Sut allwn ni wneud ein gorau i wneud i'r plentyn ysgol sydd eisiau gwneud gemau i gredu ei fod e'n realiti?

"Ry'n ni'n edrych ar sut allwn ni fod yn sylfaen fel y gallwn ni ddweud mewn ychydig flynyddoedd, 'os ydych chi'n caru gemau cyfrifiadur ac eisiau gweithio yn y maes, arhoswch yng Nghymru'."

Mae Call of Duty yn un arall o'r cyfresi gemau poblogaidd y mae Rocket Science wedi gweithio arno

Cadw talent yng Nghymru

Mae'r llywodraeth wedi rhoi £825,000 i Rocket Science i agor ei phencadlys Ewropeaidd yng Nghaerdydd a chynnig gwaith am o leiaf y pum mlynedd nesaf.

Diwydiant bychan sy'n tyfu yw'r diwydiant datblygu gemau cyfrifiadurol yng Nghymru.

Yn ôl cymdeithas y datblygwyr gemau cyfrifiadurol annibynnol, TIGA, roedd 140 o ddatblygwyr gemau yng Nghymru yn 2022 o gymharu â llai na 100 yn 2020.

Yn 2021, roedd gan Gymru 0.7% o'r gweithlu datblygu - llawer yn llai na llefydd fel Llundain, de-ddwyrain Lloegr a'r Alban, sy'n gartref i un o gwmnïau datblygu gemau cyfrifiadurol mwyaf y wlad, Rockstar North.

Dyna'r cwmni sy'n gyfrifol am y gyfres gemau enwog Grand Theft Auto.

Caerdydd sydd â'r nifer fwyaf o ddatblygwyr gemau yng Nghymru, gyda chlystyrau bychan yn y gogledd-ddwyrain ac Abertawe.

Mae cwmni Wales Interactive o Benarth yn dylunio ac yn cyhoeddi gemau fideo

Mae'r cyhoeddwr mwyaf, Wales Interactive, wedi cyhoeddi gemau ar gyfer Nintendo, PlayStation ac Xbox.

Dywedodd sylfaenydd a phrif weithredwr y cwmni, David Banner, bod y diwydiant yn llawn potensial i Gymru.

"Mae'r diwydiant gemau cyfrifiadurol yn gwneud mwy o arian na ffilm a cherddoriaeth gyda'i gilydd," meddai.

"Roedd amser pan nad oedd cefnogaeth ar gael i gemau cyfrifiadurol ond mae ar gael nawr. Mae yna lwybr i gael buddsoddiad yn y diwydiant yng Nghymru.

"Mae llawer o bobl yn awyddus i gael eu cyfle yn y diwydiant gemau cyfrifiadurol beth bynnag eu sgiliau, boed yn raglennu, celf neu gyfrifeg.

"Bydd buddsoddi yn y diwydiant gemau yn cadw'r talent yna ac yn gwneud yn siŵr nad yw'n gadael Cymru ac yn helpu'r economi leol."

Mae David Banner yn croesawu'r gefnogaeth sydd ar gael i'r diwydiant erbyn hyn

Mae yna dwf yn nifer y cyrsiau cynllunio a datblygu gemau cyfrifiadurol i greu gweithlu gyda'r sgiliau angenrheidiol.

Mae cyrsiau ym Mhrifysgol De Cymru a Phrifysgol Glyndŵr Wrecsam wedi eu hen sefydlu, yn ogystal â mewn colegau eraill.

Sefydlwyd Ffowndri Datblygu Gemau Cymru y llynedd gan gwmni iungo Solutions mewn partneriaeth â Choleg Pen-y-bont ac asiantaeth Cymru Greadigol.

Nod y rhaglen yw gwella sgiliau unigolion sydd â diddordeb mewn datblygu gemau cyfrifiadurol a thechnoleg ymgolli (immersive technology).

Dywedodd prif weithredwr a sylfaenydd iungo, Jessica-Leigh Jones, bod Cymru'n "unigryw" o ran y strwythur creu gemau cyfrifiadurol yma.

'Ffrwydrad yn y diwydiant ers 2020'

"Does ganddom ni ddim busnesau gemau mawr fel Rockstar North yn Yr Alban. Yn hytrach, mae ganddom ni glwstwr o ddatblygwyr annibynnol sy'n cael ei yrru gan weithlu llawrydd," meddai Ms Jones.

"O ganlyniad, mae'r sector yn cyd-weithio llawer mwy o gymharu â rhanbarthau eraill ac mae cymuned gref ymysg y datblygwyr.

"O edrych ar ein gwaith ni o fewn i'r diwydiant gemau yng Nghymru, rwy'n credu'n gryf y gallwn ni greu canolfan ddatblygu gemau gyda chefnogaeth y diwydiant.

"Mae Cymru'n cyflawni llawer mwy na'i photensial yn yr economi greadigol.

"Mae ganddom ni sector deledu a sgrȋn gref a thra bod y clwstwr datblygu gemau yn llai na rhanbarthau eraill, ry'n ni wedi gweld ffrwydrad yn y diwydiant gemau cyfrifiadurol ers 2020."

• Gadael gradd i wneud gyrfa mewn gemau

• Gall Fortnite 'fod o fudd yn y dosbarth'

Dywedodd y dirprwy weinidog dros y celfyddydau, chwaraeon a thwristiaeth, Dawn Bowden y byddai buddsoddiad sylweddol y llywodraeth yn cefnogi'r nod o ddatblygu'r diwydiant gemau yng Nghymru.

"Mae potensial gan y stiwdio newydd hon gan Rocket Science i newid pethau go iawn i'r sector, gan greu 50 o swyddi sy'n talu'n dda, gyrru twf economaidd a datblygu sector gemau cyfrifiadurol Cymru ymhellach, gan gynnig swyddi o safon i'r genhedlaeth hon a chenedlaethau'r dyfodol," meddai.

"Mae Llywodraeth Cymru wedi ymrwymo i weithio mewn partneriaeth gyda diwydiannau'r dyfodol i greu swyddi newydd o safon uchel tra'n cefnogi'r staff sydd eisoes yn gweithio yn y sector hon i ddatblygu'i sgiliau."