Swyddi yn y fantol mewn 29 o siopau Wilko Cymru

Mae swyddi gweithwyr siopau Wilko yng Nghymru yn y fantol wrth i weinyddwyr ddweud bod disgwyl i safleoedd gau.

Mae gan Wilko - aeth i ddwylo gweinyddwyr yn gynharach yn y mis - 29 o siopau yng Nghymru.

Dros y DU, mae gan y cwmni 400 o siopau ac mae'n cyflogi dros 12,000 o bobl.

Mewn datganiad ddydd Mercher, dywedodd y gweinyddwyr, PwC, bod ymgais i ganfod prynwr i'r busnes wedi methu.

"Yn anffodus, mae'n debygol felly y bydd diswyddiadau a chau siopau yn y dyfodol..." meddai PwC.

• Cwmni electroneg i greu 250 swydd ym Mhowys

• Pryder am 250 o swyddi mewn cwmni offer amddiffyn

Er hynny, dywedodd y gweinyddwyr ei bod yn bosib y gallai prynwyr i rannau o'r busnes ddod i'r amlwg.

"Wrth i drafodaethau barhau gyda'r rhai sydd â diddordeb mewn prynu rhan o'r busnes, mae'n glir nad prynu'r busnes llawn yw natur y diddordeb hwnnw."

Fe fydd siopau'n parhau ar agor am y tro, ac fe fydd staff yn cael eu talu, meddai PwC.

Roedd awgrym yn gynharach gan undeb y byddai siopau'n cau erbyn yr wythnos nesaf.

Ond dywedodd PwC "nad oes bwriad cau unrhyw siopau'r wythnos nesaf, ar hyn o bryd".

Ychwanegodd PwC ei fod yn deall y byddai'r cyhoeddiad yn ychwanegu at y straen ar staff, a bod cefnogaeth ar gael.