'Pwysig' arddangos cynnyrch Cymreig ar Celebrity MasterChef
- Cyhoeddwyd
![Wynne Evans](https://ichef.bbci.co.uk/ace/standard/976/cpsprodpb/BE31/production/_130898684_p0g59myl.jpg)
Mae Wynne yn adnabyddus fel canwr opera a chyflwynydd BBC Radio Wales
Mae'r cyflwynydd a'r canwr opera Wynne Evans wedi cael "cyfle gwych" i ymddangos yn y gyfres ddiweddaraf o Celebrity MasterChef.
Dywedodd ei fod mor falch o allu defnyddio ac arddangos cynnyrch Cymreig a rhoi llwyfan i gwmnïau bach o Gymru.
Mewn sgwrs ar raglen Bore Sul BBC Radio Cymru, dywedodd fod y profiad yn un "nerfus" ac "anodd" ar adegau.
Bydd Wynne yn ymddangos yn rownd gyn-derfynol y gystadleuaeth cyn bo hir.
Mae Wynne wedi bod yn defnyddio cynhwysion o Gymru yn ystod y gyfres a gafodd ei ffilmio ddechrau'r flwyddyn ond sy'n cael ei darlledu ar hyn o bryd.
Dywedodd Wynne: "Mae'n bwysig i wneud pethau Cymreig. Yn y dechrau dwi'n defnyddio salt marsh lamb, Penclawdd cockles, whisgi Penderyn, Felinfoel.
"Dwi eisiau cefnogi'r cwmnïau bach yng Nghymru sy'n gwneud pethau hyfryd i fwyta. Mae'n bwysig i fi eu defnyddio yn y rhaglen," ychwanegodd.
![Jamelia, Wynne Evans, Cheryl Hole, Locksmith, Sam Fox](https://ichef.bbci.co.uk/ace/standard/976/cpsprodpb/7011/production/_130898682_p0g59lgz.jpg)
Dywedodd Wynne Evans (ail o'r chwith) ei fod yn falch o'r cyfle i ymddangos ar y rhaglen
"Mae'n gyfle gwych ond i ddweud y gwir, dwi'n nerfus, dwi'n nerfus iawn.
"Pan 'dych chi'n mynd am y gegin am y tro cyntaf - o, just overwhelmed!
"Mae'n anodd just i wneud y popty, y peiriannau, mae'n anodd."
Dywedodd fod ganddo brofiad yn coginio pan yn iau ac fe gafodd wersi gyda 'Brenhines y Gegin' - Ena Thomas.
![Ena Thomas ar Heno, S4C](https://ichef.bbci.co.uk/ace/standard/976/cpsprodpb/6185/production/_113256942_4c6de765-ac82-4e51-b821-69ada7cf3774.jpg)
Roedd Ena yn adnabyddus fel 'Brenhines y Gegin' a bu ar raglen Heno yn coginio am flynyddoedd
Dywedodd Wynne mai ei fam wnaeth drefnu iddo gael y gwersi coginio.
"Dwi'n mwynhau achos pan o'n i'n blentyn roedd fy mam yn poeni... felly mae'n anfon fi i wersi coginio gyda Ena Thomas.
"Felly o'n i'n mynd i wersi yn y ganolfan ieuenctid yng Nghaerfyrddin - gwersi coginio gydag Ena - am dair blynedd pan o'n i'n blentyn.
"Dwi'n dwlu yn y gegin felly pan ddaeth y cyfle i fynd ar MasterChef o'n i, ie, dyma oedd Ena eisiau."
Yr her anoddaf?
"Y sialens yw coginio yn y gegin, mae'r amser yn mynd yn glou," dywedodd, "ti ddim yn cael watch na ffôn symudol felly ti ddim yn gw'bod yr amser.
"Pan ddywedodd Greg [Wallace, y cyflwynydd] 'pum munud', you just panic!"
Chwerthin oedd ymateb cyntaf Wynne Evans pan ofynnwyd iddo a fydd yn cyhoeddi llyfr neu raglen radio coginio - ond gan ychwanegu "pam lai!".
Pynciau cysylltiedig
Straeon perthnasol
- Cyhoeddwyd14 Ionawr 2022
- Cyhoeddwyd27 Ebrill 2015