Elin Jones: Gwahardd GB News yn y Senedd i 'warchod staff'

Mae Llywydd y Senedd, Elin Jones, wedi gwahardd sianel GB News yn y Senedd

Roedd penderfyniad i wahardd sianel GB News yn y Senedd er mwyn gwarchod y rheiny sy'n gweithio yno, yn ôl y Llywydd.

Fe wnaeth Elin Jones wahardd y sianel ar deledu mewnol y Senedd fis diwethaf wedi i Laurence Fox wneud sylwadau rhywiaethol am newyddiadurwr benywaidd.

Dywedodd Ms Jones wrth ASau ddydd Mercher y bydd 'na adolygiad annibynnol o ran pa sianeli teledu fydd ar gael yn y Senedd.

Dywedodd y bydd gwaharddiad GB News yn parhau yn y cyfamser.

Cafodd Laurence Fox a Calvin Robinson eu diswyddo gan GB News yn gynharach fis Hydref yn dilyn y ffrae

Wrth ymateb i gwestiwn gan arweinydd y Ceidwadwyr Cymreig, dywedodd Ms Jones: "Gobeithio y gwnewch chi ddeall a pharchu fy ymgais i warchod menywod a dynion sy'n gweithio yn y Senedd o orfod gweld y sylwadau ymosodol a misogynistaidd ar system fewnol y Senedd."

Ychwanegodd y bydd yr adolygiad yn creu "protocol darlledu" er mwyn sicrhau "eglurder a chysondeb" ar gyfer y sianeli sydd ar gael ar system deledu fewnol y Senedd.

Nid oes gwybodaeth bellach ynghylch pwy fydd yn gwneud yr adolygiad.

• Cyhuddo Andrew RT Davies o gasineb at fenywod ar ôl sylw gwallt

• Dim mwy o sianel deledu GB News yn y Senedd

Dywedodd Ms Jones nad oedd hi wedi gwahardd y sianel oherwydd ei bod yn anghytuno â phenderfyniadau golygyddol a gwleidyddol y sianel, ond oherwydd y sylwadau "ymosodol, misogynistaidd gan Mr Fox, gyda chymorth y cyflwynydd".

Fe holodd arweinydd y Ceidwadwyr Cymreig, Andrew RT Davies, pryd fyddai'r adolygiad yn cael ei gwblhau, ond ni wnaeth Ms Jones gyflwyno unrhyw fanylion.

Dywedodd Llywydd y Senedd ei bod wedi ysgrifennu at brif weithredwr GB News i holi pa wersi yr oeddent wedi eu dysgu, a pha ganllawiau newydd y maen nhw wedi eu cyflwyno. Dywedodd nad ydy hi wedi derbyn ateb.