Pencampwriaeth Rygbi Unedig: Caerdydd 31-24 Stormers

Mae'r canlyniad yn codi Caerdydd i'r nawfed safle yn y tabl

Fe lwyddodd Caerdydd i sgorio cais yn yr eiliadau olaf i sicrhau buddugoliaeth ddramatig yn erbyn y Stormers yn y brif ddinas.

Aeth yr ymwelwyr ar y blaen wedi chwe munud yn unig, gyda'r bachwr, Andre-Hugo Venter yn sgorio cais wedi sgarmes symudol bwerus.

Pum munud yn ddiweddarach, a daeth yr ail gais i'r Stormers, wrth i'r tîm o Dde Affrica ddefnyddio sgarmes symudol unwaith eto i ddenu amddiffynwyr Caerdydd, cyn lledu'r bel allan at Rohan Nel a orffennodd y symudiad.

Fe wnaeth y tîm cartref daro 'nôl wrth i Gabriel Hamer-Webb fanteisio ar waith ardderchog gan Tinus de Beer i sgorio ei gais gyntaf i Rygbi Caerdydd.

A chyn yr egwyl roedd Caerdydd yn ôl yn gêm wrth i Liam Belcher goroni gwaith ymosodol gwych gan y blaenwyr.

Y Cymro Mason Grady sgoriodd trydydd cais Caerdydd

Yn fuan yn yr ail hanner daeth trydydd cais i'r Stormers, ac ail i'r canolwr Rohan Nel - ond fel yn yr hanner cyntaf, fe wnaeth y tîm cartref daro 'nôl.

Fe gasglodd asgellwr Cymru, Mason Grady y bêl tua deg metr o'r llinell gais, cyn curo dau o amddiffynwyr Stormers a chroesi'r gwyngalch.

Daeth Caerdydd yn gyfartal wedyn drwy gic gosb Tinus de Beer.

Fe wnaeth y ddau dîm fethu cyfleoedd i ennill y gêm yn y munudau olaf - Ben Thomas a Sacha Feinberg-Mngomezulu yn methu ciciau hwyr - ond gydag 80 munud wedi ei chwarae, fe gipiodd Caerdydd y fuddugoliaeth drwy gais Rhys Litterick.

Mae'r canlyniad yn codi Caerdydd i'r nawfed safle yn y tabl.