Abertawe'n penodi Luke Williams yn rheolwr newydd

Bydd George Lawtey (chwith) a Ryan Harley (dde) hefyd yn symud gyda Luke Williams (canol) o Notts County i Abertawe

Mae Clwb Pêl-droed Abertawe wedi penodi Luke Williams yn rheolwr newydd.

Mae Williams yn ymuno â'r Elyrch o Notts County yn Adran Dau, a bydd yn olynu Michael Duff a gafodd ei ddiswyddo ar 4 Rhagfyr.

Dyma fydd yr eildro iddo weithio i'r clwb, wedi iddo dreulio cyfnod fel rhan o dîm hyfforddi Russell Martin yn nhymor 2021-22.

Dywedodd cadeirydd Abertawe, Andy Coleman bod y clwb wedi "dilyn prosesau manwl" wrth chwilio am hyfforddwr newydd, a bod Williams yn "arweinydd sy'n rhannu gweledigaeth y bwrdd ar gyfer dyfodol y clwb".

Roedd Luke Williams yn rhan o dîm rheoli Russell Martin yn Abertawe ac MK Dons

Williams oedd hyfforddwr Notts County pan enillodd y clwb ddyrchafiad o Gynghrair Genedlaethol Lloegr y llynedd, ac mae'n gadael y clwb yn y pumed safle yn Adran Dau.

Bydd Ryan Harley a George Lawtey hefyd yn symud o Notts County i Abertawe, ac wedi eu penodi yn is-reolwr a hyfforddwr.

Daeth cadarnhad bod Alan Sheehan, a gafodd ei benodi yn rheolwr dros dro, yn dychwelyd i'w rôl fel hyfforddwr, tra bod disgwyl i Kristian O'Leary a Martyn Margetson barhau yn eu swyddi hefyd.

Bydd gêm gyntaf Williams wrth y llyw yn erbyn Morecambe yn nhrydedd rownd Cwpan FA Lloegr ddydd Sadwrn.