Dafydd Jenkins, 21, yn gapten Cymru ar gyfer y Chwe Gwlad 2024

Dafydd Jenkins sydd wedi'i enwi yn gapten - ag yntau ond yn 21 oed

Mae Warren Gatland wedi enwi pum chwaraewr heb gap yng ngharfan Cymru ar gyfer Pencampwriaeth y Chwe Gwlad sy'n dechrau fis nesaf.

Dafydd Jenkins, yn 21 oed, sydd wedi ei ddewis yn gapten yn sgil anaf i Jac Morgan.

Mae Cameron Winnett, Evan Lloyd, Alex Mann a Mackenzie Martin - oll o Rygbi Caerdydd - ynghyd â phrop Caerfaddon, Archie Griffin i gyd wedi eu cynnwys.

Nid yw Louis Rees-Zammit wedi'i gynnwys yn dilyn y cyhoeddiad annisgwyl ddydd Mawrth ei fod yn gadael rygbi yn gyfan gwbl er mwyn dilyn gyrfa Bêl-droed Americanaidd.

Dau enw mawr arall sydd ddim wedi eu cynnwys yw Dan Biggar a Leigh Halfpenny, wedi i'r ddau ymddeol o rygbi rhyngwladol wedi Cwpan Rygbi'r Byd y llynedd.

Dyw'r cefnwr Liam Williams ddim ar gael chwaith gan ei fod bellach yn chwarae yn Japan, tra bod Taulupe Faletau, Christ Tshiunza a Dewi Lake am fethu'r bencampwriaeth oherwydd anaf.

Bydd Cymru yn croesawu'r Alban i Stadiwm Principality yn eu gêm gyntaf yn y gystadleuaeth ar 3 Chwefror.

Carfan Cymru yn llawn

Blaenwyr: Corey Domachowski, Kemsley Mathias, Gareth Thomas, Elliot Dee, Ryan Elias, Evan Lloyd*, Keiron Assiratti, Leon Brown, Archie Griffin*, Adam Beard, Dafydd Jenkins (capten), Will Rowlands, Teddy Williams, Taine Basham, James Botham, Alex Mann*, Mackenzie Martin*, Tommy Reffell, Aaron Wainwright.

Olwyr: Gareth Davies, Kieran Hardy, Tomos Williams, Sam Costelow, Cai Evans, Ioan Lloyd, Mason Grady, George North, Joe Roberts, Nick Tompkins, Owen Watkin, Josh Adams, Rio Dyer, Tom Rogers, Cameron Winnett*.

*heb gap rhyngwladol

Ar unrhyw ddiwrnod arall mi fyddai'r newyddion am y capten newydd Dafydd Jenkins a'r pump sydd eto i ennill capiau rhyngwladol yn dipyn o stori ynddo'i hun, ond mae'r cyfan wrth reswm wedi llithro i'r cefndir yn sgil cyhoeddiad Louis Rees-Zammit.

Yr hyn sy'n amlwg ynglŷn â rygbi Cymru ar hyn o bryd yw'r naratif o ail-adeiladu ac edrych at y genhedlaeth nesa'.

Y gwir yw does fawr o opsiynau gan Warren Gatland yn sgil anafiadau a rhai'n ymddeol, mewn sefyllfa 'arferol' heb y wasgfa ariannol mae'n bosib na fyddai'r chwaraewyr yma wedi bwrw eu swildod ar y lefel rhanbarthol.

Mae hynny i gyd yn wir wrth gwrs ond mae'n gam anferthol i'r chwaraewyr hynny sy' mor ifanc ac mor ddibrofiad.

Darllenwch ddadansoddiad llawn Cennydd yma.

Dydd Sadwrn, 3 Chwefror - Cymru v Yr Alban

• Dydd Sadwrn, 10 Chwefror - Lloegr v Cymru

• Dydd Sadwrn, 24 Chwefror - Iwerddon v Cymru

• Dydd Sul, 10 Mawrth - Cymru v Ffrainc

• Dydd Sadwrn, 16 Mawrth - Cymru v Yr Eidal

Gallwch dderbyn hysbysiadau am straeon mawr sy'n torri yng Nghymru drwy lawrlwytho ap BBC Cymru Fyw ar Google Play neu App Store.