Rhybudd am fwy o law trwm a llifogydd posib i'r de a'r canolbarth

Mae rhybuddion mewn grym ar gyfer pob sir yn ne a chanolbarth Cymru ddydd Mawrth

Mae'r Swyddfa Dywydd wedi cyhoeddi rhybudd melyn am law trwm ddydd Mawrth, gan ddweud y gallai arwain at lifogydd a thrafferthion teithio mewn mannau.

Mae'r rhybudd mewn grym ar gyfer rhannau o bob sir yn y canolbarth a'r de, rhwng 07:00 a 23:59.

Maen nhw hefyd wedi cyhoeddi rhybudd melyn arall am law trwm ddydd Mercher.

Mae'r rhybudd hwn ar gyfer y de ddwyrain ac mewn grym rhwng 06:00 a 23:59 ddydd Mercher.

Daw'r rhybuddion wythnos ar ôl i'r de-orllewin brofi llifogydd difrifol, gyda busnesau lleol yn dal i lanhau ar ôl y difrod.

Daw'r rhybudd diweddaraf wythnos ar ôl i lifogydd achosi difrod sylweddol yn y de-orllewin, fel yma yn Hendy-gwyn ar Daf

Ddydd Mawrth, mae disgwyl i hyd at 50mm o law ddisgyn yn eang ar draws y de, a hyd at 80mm mewn rhai ardaloedd, ac fe allai achosi toriadau pŵer.

Yn ôl y Swyddfa Dywydd, bydd y glaw yn drwm a pharhaus ar adegau, gyda'r tywydd gwaethaf yn ystod y prynhawn ac ar ddechrau'r nos.

Mae rhybuddion hefyd am wyntoedd cryfion o'r de, gan greu amodau teithio anodd i ac oedi posib ar fysiau a threnau.