Dewch i grwydro... Sir Benfro

Mae Cymru Fyw wedi gofyn i dywysyddion swyddogol o amgylch Cymru i roi cyngor am lefydd difyr i fynd dros gyfnod gwyliau'r Pasg.

Mae Keith Thomas yn byw ym mhentre' bach Llanrhian ar arfordir gogledd Sir Benfro.

Mae'n gweithio fel tywysydd yn arwain teithiau i ymwelwyr o amgylch Cymru gyfan.

Dyma ddewis Keith am lefydd difyr i fynd dros wyliau'r Pasg ac ar benwythnosau yn ardal Sir Benfro a de orllewin Cymru.

Castell Caeriw, Sir Benfro

Mae 'na amryw o gestyll gallwch ymweld â nhw yn Sir Benfro.

Un o ffefrynnau Keith yw Castell Caeriw, a hynny am sawl rheswm.

Yn ôl Keith: "Mae'r castell ei hun yn enghraifft dda o adeilad sydd wedi ei addasu a newid dros bron i 500 mlynedd.

"Yn wreiddiol, roedd yn perthyn i Rhys ap Tewdwr, cyn iddo gael ei ladd gan y Normaniaid. Hwn hefyd oedd cartef (neu un ohonynt!) y Dywysoges Nest – un o fenywod mwyaf enwog Cymru, ac yn fam-gu i Gerallt Gymro," meddai.

Hanner milltir i ffwrdd o'r castell mae "un o drysorau cudd y Sir, sef pentref Carew Cheriton," meddai Keith.

Nepell i'r castell mae hen eglwys Santes Fair, lle y claddwyd un o berchnogion enwoca'r castell, sef Rhys ap Tomos.

Yn ôl yr hanes, fe oedd y dyn laddodd y Brenin Richard III yn 1485, ac wrth wneud hynny, rhoi'r Cymro Harri Tudur ar yr orsedd.

Porth Stinan

Mae Tyddewi yn fan poblogaidd iawn, ond rhyw ddwy filltir i'r gorllewin mae Porth Stinan.

Wrth gerdded ar lwybr yr arfordir y byddwch yn pasio safle bad achub Tyddewi ac mae'r golygfeydd tuag at Ynys Dewi yn odidog.

Eglwys Sain Brynach

Mae eglwys Sain Brynach wedi'i lleoli ym mhentref Nanhyfer. Roedd Sain Brynach yn un o ddilynwyr Dewi Sant ac mae eglwys yma i gofio amdano.

Mae'r garreg Geltaidd sydd yn sefyll ym mynwent yr eglwys yn un o'r enghreifftiau gorau o gerrig tebyg sydd yng Nghymru.

Ar ddrws yr eglwys hefyd mae carreg hynafol arall, sy'n cynnwys ysgrifen Ogham, sef wyddor gynnar Wyddelig.

Pentre Ifan

Os oes gennych chi ddiddordeb mewn archeoleg, mae Pentre Ifan, sy' tu allan i Drefdraeth, yn lle delfrydol i fynd.

Yma mae safle claddu sydd dros 5,000 o flynyddoedd oed. Mae'r cerrig hyn yn dystiolaeth fod pobl wedi bod yn byw yn Sir Benfro miloedd o flynyddoedd yn ôl.

Mae chwarel yn agos iawn i'r safle yma hefyd, a'r sôn fod cerrig enwog Stonehenge, 160 milltir i ffwrdd, wedi cael eu cario oddi yno.