Cynllun peilot gofal brys Aberteifi yn dod i ben

Ers 11 Ionawr mae Canolfan Gofal Integredig Aberteifi yn cynnig gwasanaeth gofal brys yr un diwrnod

Bydd oriau agor ar benwythnos gwasanaeth Gofal Brys yr Un Diwrnod mewn canolfan iechyd yng Ngheredigion, yn dod i ben ddydd Sul 30 Mawrth.

Cafodd ei weithredu fel rhan o gynllun peilot yng Nghanolfan Gofal Integredig Aberteifi, ac ers 11 Ionawr mae'r gwasanaeth wedi ymestyn ei oriau agor i gynnwys dyddiau Sadwrn a Sul.

Fe wnaeth staff a chleifion y ganolfan iechyd alw fis Chwefror, i droi'r cynllun peilot i fod yn wasanaeth parhaol ar benwythnosau.

Bwriad y gwasanaeth oedd helpu i leddfu'r pwysau ar adrannau brys ysbytai, ac mae'r cynllun wedi arbed cannoedd o bobl rhag gorfod ymweld â'u hysbytai lleol.

Daw'r penderfyniad i'w gau wrth i gyllid 50 diwrnod Llywodraeth Cymru, oedd yn ariannu'r cynllun yn rhannol, ddod i ben.

Mae Llywodraeth Cymru wedi dweud yn y gorffennol mai "cyfrifoldeb y bwrdd iechyd yw penderfynu sut mae'n defnyddio ei setliad ariannu blynyddol i gynllunio a darparu gwasanaethau".

'Lleihau straen ar adrannau damweiniau ac achosion brys'

Yn ystod y saith penwythnos cyntaf, gwelodd y gwasanaeth 845 o gleifion, y byddai tua 75% ohonynt fel arall wedi mynd i adran achosion brys, meddai Bwrdd Iechyd Hywel Dda mewn datganiad.

Roedd y model gweithio saith diwrnod hefyd fod i hwyluso treial o fodel gofal Ward Digidol.

Dros ddeufis, cafodd 63 o gleifion eu "derbyn yn rhithiol" a derbyn gofal yn nes at eu cartrefi.

Mae asesiad ar y gweill ar hyn o bryd i ddeall effaith gweithredu'r gwasanaethau ar y penwythnosau.

Bydd y gwerthusiad hwn yn dechrau unwaith y bydd y treial tri mis wedi'i gwblhau.

Dywedodd John Evans, Cyfarwyddwr Sir Ceredigion a Sir Benfro yn BIP Hywel Dda, fod yr oriau agor dros dro yma wedi rhoi cymorth "amhrisiadwy i'n cymuned".

"Gan leihau'r straen ar adrannau damweiniau ac achosion brys, a chaniatáu i ni archwilio modelau gofal newydd."

'Edrych ymlaen at ganlyniadau'r asesiad'

Ychwanegodd Mr Evans eu bod yn ddiolchgar am yr adborth.

"Rydym yn ddiolchgar am yr holl adborth cadarnhaol gan y rhai sydd wedi defnyddio'r gwasanaeth ac yn edrych ymlaen at ganlyniadau'r asesiad parhaus."

Bydd gwasanaeth Gofal Brys yr Un Diwrnod yng Nghanolfan Gofal Integredig Aberteifi yn parhau i fod ar agor o ddydd Llun i ddydd Gwener, o 0800 tan 18:00.

Gall cleifion gerdded i mewn ond maen nhw'n cael eu hannog i ffonio'n gyntaf i siarad â nyrs, a threfnu amser apwyntiad.