Gweilch a'r Scarlets 'eisiau eglurder' cyn arwyddo cytundeb URC

Mae'r Gweilch a'r Scarlets yn dweud nad ydyn nhw am arwyddo Cytundeb Rygbi Proffesiynol (PRA25) newydd tan eu bod yn cael rhagor o eglurder gan Undeb Rygbi Cymru (URC).

Roedd yr undeb wedi rhoi hyd nes 8 Mai i'r rhanbarthau arwyddo'r cytundeb newydd, ond dim ond y Dreigiau a Rygbi Caerdydd sydd wedi gwneud hynny.

Mae'r cytundeb, sy'n cynnwys cynnydd mewn cyllideb o hyd at £6.5m o'i gymharu â'r £4.5m presennol, yn parhau tan 2029 ac yn un o elfennau allweddol cynllun hirdymor Undeb Rygbi Cymru o dan eu strategaeth 'Cymru'n Un'.

Ond dydi'r ddau ranbarth yn y gorllewin ddim yn hapus gyda chynnwys y cytundeb, gyda phenderfyniad URC i gamu mewn ar ôl i Rygbi Caerdydd fynd i ddwylo'r gweinyddwyr fis diwethaf ymhlith y "materion allweddol" sy'n achosi pryder.

Mewn datganiad ar y cyd, dywedodd y Scarlets a'r Gweilch: "Rydyn ni wedi gofyn i URC gynnig rhagor o eglurder ynglŷn â'r berchnogaeth o Gaerdydd ac i sicrhau nad ydi'r clybiau annibynnol dan anfantais.

"Rydym yn gofyn am ragor o wybodaeth er mwyn sicrhau tryloywder, proffesiynoldeb, tegwch a chynaliadwyedd hir dymor timau proffesiynol Cymru.

"Mae'r trafodaethau gyda'r undeb yn parhau, ac rydyn ni'n gobeithio am ganlyniad cadarnhaol yn y dyfodol agos.

"Tan ein bod ni'n derbyn rhagor o eglurder, dydyn ni methu arwyddo'r PRA25."

Mae Undeb Rygbi Cymru wedi dweud yn y gorffennol y byddai'r cytundeb ariannol newydd yn "diogelu dyfodol y gêm broffesiynol" yng Nghymru.