Caernarfon: Cyhuddo dyn yn dilyn digwyddiad â gwn ffug

Bydd swyddogion yn parhau yn ardal Lôn y Bryn am y tro

Mae dyn 28 oed wedi cael ei gyhuddo yn dilyn digwyddiad yn ymwneud â gwn ffug yng Nghaernarfon.

Cafodd yr heddlu eu galw i adroddiadau o anrhefn ar Lôn y Bryn yn y dref am 21:38 nos Sul.

Cafodd pump o bobl eu harestio ddydd Llun mewn cysylltiad â'r achos.

Mae Mark Griffiths o Lon Helen, Caernarfon bellach wedi ei gyhuddo o fod â gwn ffug yn ei feddiant gyda'r bwriad o achosi ofn.

Fe wnaeth Mr Griffiths ymddangos yn Llys Ynadon Caernarfon ddydd Mawrth, ble cafodd ei gadw yn y ddalfa tan ei ymddangosiad nesaf yn Llys y Goron y dref ar 21 Hydref.

Dywedodd Heddlu'r Gogledd y byddai swyddogion yn parhau yn yr ardal am y tro.