Mam o Wynedd yn pledio'n euog i bedwar achos o esgeuluso plant

Clywodd Llys Ynadon Caernarfon ddydd Iau bod cymdogion wedi codi pryderon ar ôl i larwm dân seinio am gyfnod hir o amser

Mae mam 33 oed o Wynedd wedi pledio'n euog i bedwar achos o esgeuluso plant.

Clywodd Llys Ynadon Caernarfon ddydd Iau bod cymdogion wedi codi pryderon ar ôl i larwm dân seinio am gyfnod hir o amser.

Ar ran yr erlyniad, dywedodd Helen Hall bod y larwm wedi canu am gyfnod hir a bod y cymdogion, pan yn edrych drwy'r ffenestr, wedi gweld dau blentyn noeth yng nghyntedd y tŷ a bod yr heddlu wedi'u galw.

Ychwanegodd bod yr heddlu yn pryderu am yr amodau byw yn y tŷ oedd yn gartref i bedwar o blant.

Dywedodd bod cyflwr y tŷ yn peri pryder a bod carthion yn yr ystafell folchi ac ystafell wely ac nad oedd yr heddlu yn gallu dweud ai carthion dynol neu rhai anifeiliaid oedden nhw.

Cyfaddefodd y fenyw ei bod wedi "ymosod yn fwriadol, cam-drin, esgeuluso a gadael" pob plentyn mewn modd "sy'n debygol o achosi dioddefaint neu niwed diangen i’w hiechyd".

Fe blediodd y fam yn euog i bedwar cyhuddiad ar wahân. Nid oes modd enwi'r fam na'r plant am resymau cyfreithiol.

Cafodd ei rhyddhau ar fechnïaeth amodol ac mae disgwyl iddi hi gael ei dedfrydu yn Llys y Goron Caernarfon ar 11 Hydref.